BAKI, AzerVoice, Nailə Babazadə
Türkiyə, Suriyanın sabitliyi və təhlükəsizliyi, eləcə də bölgənin əmin-amanlığı üçün, başda terror təşkilatları ilə mübarizə olmaqla, Suriya hökuməti ilə sıx əməkdaşlığı davam etdirməkdə və ‘Tək Dövlət, Tək Ordu’ prinsipini dəstəkləməkdə qərarlıdır.
AzerVoice xəbər verir ki, Türkiyə Milli Müdafiə Nazirliyinin Mətbuat və İctimaiyyətlə Əlaqələr müşaviri və sözçüsü Tuğamiral Zəki Aktürk, nazirlikdə keçirilən həftəlik mətbuat konfransında bu açıqlamanı səsləndirib.
Açıqlamada qeyd olunub ki, Suriya hökuməti ilə SDQ (YPG/PKK) terror təşkilatı arasında olan təmaslar diqqətlə və həssaslıqla izlənilir. Son olaraq Münbiç və Hələb bölgəsində Suriya hökumət qüvvələrinə qarşı həyata keçirilən hücumlar, SDQ-nin 10 mart 2025-ci ildə Suriya hökuməti ilə imzaladığı razılaşmaya uyğun davranmadığını və bunun bölgədə sülh və sabitliyə təhdid yaratdığını bir daha açıq şəkildə ortaya qoyub.
“Türkiyə, Suriyanın sabitliyi və təhlükəsizliyi ilə bölgəmizin əmin-amanlığı naminə, başda terror təşkilatları ilə mübarizə olmaqla, Suriya hökuməti ilə sıx əməkdaşlığını davam etdirməkdə və ‘Tək Dövlət, Tək Ordu’ prinsipini dəstəkləməkdə qətiyyətlidir.” - deyə Aktürk əlavə edib.
