BAKI, AzerVoice, Nailə Babazadə
Türkiyənin Nəqliyyat və İnfrastruktur Naziri Abdulkadir Uraloğlu, Hicaz Dəmir Yolu xəttinin yenidən işə salınması üçün ilk praktiki addımın atıldığını açıqlayıb.
AzerVoice xəbər verir ki, nazir, Türkiyə, Suriya və İordaniya Nəqliyyat Nazirlikləri arasında keçirilən texniki görüş zamanı əldə olunan razılaşmalar barədə məlumat verib.
Uraloğlu bildirib ki, Türkiyənin dəstəyi ilə Suriya Hicaz Dəmir Yollarına aid olan 30 kilometrlik yarımçıq üst quruluşun tamamlanması məsələsində razılıq əldə olunub. Eyni zamanda İordaniya tərəfi də lokomotivlərin təmiri və istismarı ilə bağlı texniki imkanları araşdıracaq.
Görüş 2025-ci il 11 sentyabr tarixində Ammanda baş tutub. Nazir Uraloğlu, görüş zamanı üçtərəfli nəqliyyat əməkdaşlığını əhatə edən bir Anlaşma Memorandumu layihəsi üzərində razılıq əldə olunduğunu və bu sənədin yaxın aylarda nazirlər səviyyəsində imzalanmasının planlaşdırıldığını vurğulayıb.
Nazirin sözlərinə görə, anlaşmanın imzalanmasından sonra ilk mərhələdə avtomobil yolları, dəmir yolları və nəqliyyat dəhlizləri sahəsində üçtərəfli texniki işçi qrupları fəaliyyətə başlayacaq. Hazırda tərəflər bu məqsədlərə çatmağa yönəlmiş bir fəaliyyət planı üzərində işləyirlər. Planın ilkin versiyası Türkiyə tərəfindən hazırlanacaq və nazirlər toplantısına qədər yekunlaşdırılacaq.
Uraloğlu Hicaz Dəmir Yolu ilə bağlı bu təşəbbüsü “tarixi addım” adlandırıb. Suriya ərazisində 30 km-lik çatışmayan hissənin tamamlanması, İordaniyanın isə öz dəmir yolu lokomotivlərini Dəməşqə qədər işlətmək imkanlarını araşdırması nəzərdə tutulur.
Nazir əlavə edib ki, orta və uzunmüddətli mərhələdə, Hicaz Dəmir Yolu layihəsindən ayrı olaraq, üç ölkə arasında dəmir yolu sahəsində təlim və texniki təcrübə mübadiləsi aparılması planlaşdırılır.
Nazir Uraloğlu görüşün digər vacib nəticələrindən birinin də 13 illik fasilədən sonra Türkiyə ilə İordaniya arasında, Suriya üzərindən keçməklə qarayolu nəqliyyatının yenidən bərpa olunması olduğunu bildirib. Tərəflər qarşılıqlı keçidlərə dair milli tənzimləmələr çərçivəsində asanlaşdırıcı tədbirlər görmək barədə də razılığa gəliblər.
Toplantıda Türkiyənin Akabe Limanı vasitəsilə Qırmızı dənizə çıxışını genişləndirəcək yeni nəqliyyat dəhlizləri də gündəmdə olub. Nazir qeyd edib ki, Suriya və İordaniyanın Türkiyə üzərindən beynəlxalq nəqliyyat dəhlizlərinə çıxışı üçün birgə texniki işlər həyata keçiriləcək.