BAKI, AzerVoice, Nailə Babazadə

Türkiyə Milli Müdafiə Nazirliyi, Türk Silahlı Qüvvələrinin (TSK) terrorla mübarizədə qətiyyətli fəaliyyətlərini davam etdirdiyini və Suriyadakı əməliyyat bölgələrində indiyədək 580 kilometr uzunluğunda tunelin məhv edildiyini açıqlayıb. Eyni zamanda, TSK inventarına yeni yerli və milli sistemlərin daxil olduğu bildirilib.

AzerVoice xəbər verir ki, nazirlik tərəfindən keçirilən həftəlik mətbuat brifinqində terrorla mübarizə, sərhəd təhlükəsizliyi, beynəlxalq missiyalar və müdafiə sənayesindəki son yeniliklər barədə ətraflı məlumat verilib.

Türkiyə Milli Müdafiə Nazirliyinin açıqlamasında bildirilib ki, TSK-nın həm ölkə daxilində, həm də sərhəd kənarında terrorçulara qarşı mübarizəsi fasiləsiz davam edir. Son bir həftə ərzində daha bir PKK terrorçusu təslim olub. Suriya əməliyyat bölgələrində, xüsusilə Tel Rıfat və Menbiçdə məhv edilən tunellərin ümumi uzunluğu 580 kilometrə çatıb.

Türkiyə tarixinin ən sıx tədbirləri ilə qorunan sərhədlərdə son bir həftədə 4-ü terrorçu olmaqla ümumilikdə 326 nəfər saxlanılıb.

1 yanvardan bu yana 5 min 834 nəfər sərhədi qanunsuz keçməyə çalışarkən tutulub, 47 min 718 nəfərin isə keçidi əngəllənib.

Van və Hatay sərhəd xəttlərində isə ümumilikdə 42 kiloqram narkotik maddə ələ keçirilib.