BAKI, AzerVoice, Nailə Babazadə

Türkiyənin Milli Müdafiə Nazirliyi (MSB) Yunanıstanın bəzi rəsmiləri tərəfindən səsləndirilən gərginliyi artırıcı açıqlamalara münasibət bildirib.

AzerVoice xəbər verir ki, açıqlama, Nazirlikdə keçirilən mətbuat brifinqindən sonra jurnalistlərin suallarına cavab verilərkən verilib.

Türkiyə MN rəsmiləri bildiriblər ki, qonşu ölkənin hərbi fəaliyyəti də daxil olmaqla, bölgədəki bütün inkişaflar diqqətlə və yaxından izlənilir. Nazirlik vurğulayıb ki, Egey dənizi də daxil olmaqla regionun sülh və sabitlik bölgəsi olması Türkiyənin əsas prioritetidir və bu istiqamətdə üzərinə düşən məsuliyyətləri yerinə yetirir.

Açıqlamada əlavə olunub ki, bəzi Yunan rəsmilərinin gərginliyi artıran açıqlamaları və beynəlxalq müqavilələrə zidd bəyanatları yalnız iki ölkə lideri arasındakı pozitiv diplomatik atmosferə zərər verir.

Türkiyə MN həmçinin qeyd edib ki, Türk Silahlı Qüvvələri özünə heç bir təhlükə yaratmayan şəxslər üçün təhlükə törətmir. Lakin ölkəyə yönələ biləcək hər cür təhlükəni dəf edəcək güc və iradəyə malikdir. Nazirlik xatırladıb ki, Türkiyəni hədəf alan təşəbbüslər keçmişdə nəticəsiz qaldığı kimi, bu gün və gələcəkdə də uğur qazanmayacaq.