BAKI, AzerVoice, Nailə Babazadə

Suriya Prezidenti Əhməd əş-Şəraa, ABŞ-ın Ankaradakı səfiri və Suriya üzrə Xüsusi Təmsilçisi Tom Barak ilə rəsmi görüş keçirib. Görüşdə Suriya Xarici İşlər Naziri Əsad Həsən Şeybani də iştirak edib.

AzerVoice xəbər verir ki, rəsmi məlumatlara görə, tərəflər bölgədəki son siyasi və təhlükəsizlik vəziyyətini müzakirə ediblər. Görüş zamanı Suriya və ABŞ arasında diplomatik əlaqələrin inkişaf etdirilməsi, qarşılıqlı anlaşmanın gücləndirilməsi və regionda sabitliyin təmin olunması məsələləri diqqət mərkəzində olub.

Xüsusi təmsilçi Tom Barak görüşdən sonra etdiyi açıqlamada, tərəflərin bölgədəki gərginliyi azaltmaq və humanitar məsələlərdə əməkdaşlığı genişləndirmək niyyətində olduqlarını vurğulayıb. Suriya tərəfi isə ölkənin daxili sabitliyinin qorunması və beynəlxalq əlaqələrin normallaşdırılması istiqamətində ABŞ ilə dialoqun vacibliyini qeyd edib.

Diplomatik mənbələr görüşün, həmçinin Suriya və ABŞ arasında qarşılıqlı maraqlara xidmət edən praktiki əməkdaşlıq sahələrinin müəyyənləşdirilməsinə imkan yaratdığını bildiriblər. Bu görüş, bölgədəki gərginliyin azaldılması və diplomatik əlaqələrin möhkəmləndirilməsi istiqamətində atılmış addım kimi qiymətləndirilir.