BAKI,AzerVoice

Suriya Prezidenti Əhməd əş-Şəraa Hələbin Bəşşar Әsəd rejimindən azad edilməsinin birinci ildönümü münasibətilə şəhərdə keçirilən tədbirlərdə iştirak edib. Hələb 2011-ci ildə rejimə qarşı ayağa qalxan ilk Suriya şəhəri olmuşdu və ardınca digər bölgələr də etirazlara qoşulmuşdu. Bir il əvvəl — 29 noyabrda — Şəraa rəhbərliyindəki ittifaq qüvvələri Hələbi nəzarətə götürərək Suriyanın ikinci böyük şəhərində tam hakimiyyət qurmuşdu.

Prezident əş-Şəraa SANA agentliyinə açıqlamasında bildirib ki, Hələbin azad olunması “bütün Suriya Ərəb Respublikasının azad edilməsinin başlanğıcıdır”.

“Bu gün qeyd etdiyimiz qələbələrə çatmaq üçün xalqımız böyük qurbanlar verib”, — deyə o bildirib.

“Hələb yenidən dirçəldi və bu dirçəlişlə birlikdə bütün Suriya yenidən doğuldu. Məhz bu anlar ölkəmizin yeni tarixini yazır — Hələbin özündə və onun qürurlu sitadeli üzərində”, — prezident yüzlərlə şəhər sakinindən ibarət auditoriya qarşısında deyib.

Çıxışdan sonra əş-Şəraa Hələb qalasının qülləsinə qalxaraq böyük Suriya bayrağının yanında şəkil çəkdirib.

Suriya dövlət başçısı qeyd edib ki, Hələbin azad edildiyi gün o, artıq anlayırdı: Dəməşqin azad olunması sadəcə zaman məsələsidir.

“Hələbin divarlarından biz azad Dəməşqi gördük. Hələb bizim üçün bütün Suriyaya yol açan qapı oldu. Hələbin azadlığından sonra Suriyanın uşaqlarının üzünə yenidən təbəssüm qayıtdı.”-deyə o bildirib.

Onun sözlərinə görə, şəhərin azad olunması “bütün xalqda Suriyanın öz birliyini və yerini yenidən bərpa edəcəyinə dair ümid yaradıb”.

“Biz bu gün sadəcə Hələbin azad edilməsinin ildönümünü qeyd etmirik. Bu, bütün Suriya və bütün region üçün yeni tarixin yazılmasına işarə edən dönüş nöqtəsidir. Lakin qarşıda uzun bərpa yolu dayanır.”