BAKI,AzerVoice, Fərid Mikayılov
Kanada hökuməti Suriyanı “terrorizmi dəstəkləyən dövlətlər” siyahısından çıxardığını açıqlayıb.
AzerVoice xəbər verir ki, Ottavanın qərarı ABŞ-ın analoji addımına, eləcə də Suriya Prezidenti Əhməd əş-Şəraanın ölkədə sabitliyin bərpasına yönəlmiş addımlarına əsaslanır.
Qərar cümə günü, uzun illər hakimiyyətdə olmuş Bəşşar Əsədin devrilməsinin birinci ildönümü ərəfəsində elan olunub.
Kanada Xarici İşlər Nazirliyi eyni zamanda Heyət Təhrir əş-Şam (HTŞ) qruplaşmasının da “terror təşkilatı” statusundan çıxarıldığını bildirib. HTŞ Əsədi devirməkdə mühüm rol oynamış koalisiyaya liderlik edən qurum idi.
“Bu addımlar müttəfiqlərimiz – Böyük Britaniya və ABŞ – tərəfindən verilən son qərarlarla uzlaşır və Suriya hökumətinin ölkədə sabitliyi irəli aparmaq, vətəndaşları üçün təhlükəsiz və inklüziv gələcək qurmaq, həmçinin regional sabitliyi möhkəmləndirmək və terrorla mübarizədə qlobal tərəfdaşlarla əməkdaşlıq səylərini əks etdirir,” – deyə bəyanatda vurğulanıb.
Kanada Suriyanı 2012-ci ildə, Əsəd rejiminin demokratiya tələbli etirazları zorla yatırması və ölkənin vətəndaş müharibəsinə sürüklənməsindən sonra “terroru dəstəkləyən dövlət” kimi siyahıya salmışdı.
HTŞ isə illərlə əl-Qaidə ilə əlaqələrinə görə sanksiyalara məruz qalmışdı. Lakin bir sıra Qərb dövlətləri qruplaşmanı yeni Suriya hökuməti ilə əməkdaşlığı asanlaşdırmaq üçün siyahıdan çıxarıb.
Kanada hökuməti buna baxmayaraq Suriya ilə bağlı 56 şəxsə, Əsədin keçmiş hökumətinin rəsmiləri və devrilmiş prezidentin ailə üzvlərinə, qarşı sanksiyaların qüvvədə qaldığını bildirib.
ABŞ isə Suriyaya qarşı sanksiyaların bir hissəsini iyunda dayandırmış, daha sonra noyabrda uzatmışdı. Bu, Prezident Əhməd əş-Şəraa ilə ABŞ Prezidenti Donald Tramp arasında Ağ evdə keçirilən görüşdən sonra mümkün olmuşdu. Görüşdən bir neçə gün əvvəl ABŞ əş-Şəraanın artıq “qlobal terrorçu” kimi xüsusi təyinatlı siyahıda olmadığını açıqlamışdı.
Bir zamanlar Suriyada əl-Qaidənin qoluna rəhbərlik edən əş-Şəraa, 2016-cı ildə təşkilatdan ayrıldıqdan sonra imicini dəyişməyə başlayıb. Əsədin devrilməsindən bu yana isə “Əbu Məhəmməd əl-Culani” ləqəbini tərk edərək doğma adı ilə çıxış edir və tolerant, inklüziv Suriya vizyonunu təbliğ edir.
Suriya lideri bu il BMT Baş Assambleyasında da çıxış edərək ölkəsinin “yenidən dünya ölkələri arasında layiqli yerini bərpa etdiyini” bildirib və ABŞ, eləcə də Avropa İttifaqı ilə iqtisadi əlaqələri gücləndirməyə çalışdıqlarını vurğulayıb.