BAKI, AzerVoice
Papa XIV Leo Qəzzada Müqəddəs Ailə Katolik Kilsəsinə edilən hava hücumuna görə təəssüfləndiyini bildirib və atəşkəsə çağırış edib.
AzerVoice xəbər verir ki, Vatikanın Mətbuat Ofisinin yaydığı açıqlamada Papa XIV Leo hücum nəticəsində həlak olanlara başsağlığı verib və bölgədə sülh çağırışı edib.
O, Müqəddəs Ailə Kilsəsinin keşişi Qabriel Romanelli və bütün camaatla həmrəylik ifadə edib. “Papa dərhal atəşkəsin təmin olunmasını, dialoqa və bölgədə daimi sülhün qurulmasına çağırır”, — deyə bəyanatda bildirilib.
İtalyan Yepiskoplar Konfransı da hücumu “qəbuledilməz” adlandıraraq, “silahların susmasının sülhə gedən yeganə yol olduğunu” vurğulayıb.
Qeyd edək ki, Fələstinin rəsmi xəbər agentliyi WAFA-ya əsasən, İsrail ordusu Qəzzanın şimalında yerləşən Müqəddəs Ailə Kilsəsini bombalayıb, nəticədə sığınacaq tapan 2 qadın ölüb, 7 nəfər isə yaralanıb.
