BAKI, AzerVoice, Nailə Babazadə
2025-ci ildə İsrail, Qəzza Zolağında davam edən müharibə ilə birlikdə dünyada ən çox jurnalisti öldürən ölkə olaraq qeydə alındı.
AzerVoice xəbər verir ki, Sərhədsiz Jurnalistlər (RSF) 2025-ci ildə dünyada media işçilərinə qarşı edilən hücumların hesabatını yayımlayıb.
Hesabata görə, bu il dünya üzrə 67 jurnalist müxtəlif hücumlarda həyatını itirib və ölənlərin təxminən yarısından İsrail məsul tutulur.
İsrailin Qəzza Zolağına etdiyi hücumlarda 2025-ci ildə 29 Fələstinli media işçisi həyatını itirdi. Bu isə dünyada həmin il öldürülən jurnalistlərin 43 faizinin İsrail hücumlarında öldüyünü göstərir.
Hesabatda İsrailin bu il də dünyada ən çox jurnalisti öldürən ölkə olduğu vurğulanıb.
2023-cü ilin oktyabrından bəri İsrailin Qəzza Zolağına etdiyi hücumlarda 220-dən çox jurnalistin öldürüldüyünə diqqət çəkilib.
"Jurnalistlərin ən pis düşməni" kimi tanınan İsrailin son 3 ildə ən çox media işçisini öldürən ölkə olduğu qeyd olunub. Hesabatda həmçinin İsrail həbsxanalarında 20 Fələstinli jurnalistin də həbsdə olduğu bildirilib.
Digər tərəfdən, hesabatda Meksikada cinayət təşkilatlarının jurnalistlərə qarşı hücumlarının artdığı qeyd olunub.
Bu il edilən hücumlarda 9 jurnalistin həyatını itirdiyi Meksikanın dünyada jurnalistlər üçün “ən təhlükəli ikinci ölkə” olduğu ifadə edilib.
Ordunun və Sürətli Dəstək Qüvvələrinin (HDQ) münaqişələrinin getdikcə şiddətləndiyi Sudanda da il ərzində 4 jurnalistin hücumlarda həyatını itirdiyi qeyd olunub. Sudanda öldürülən 4 jurnalistdən ikisinin HDQ qüvvələri tərəfindən qaçırıldıqdan sonra öldürüldüyü bildirilib.