BAKI, AzerVoice

Türkiyənin aparıcı peyk operatoru TÜRKSAT, Suriyanın müxtəlif bölgələrində qurduğu peyk terminalları vasitəsilə dövlət qurumlarının sürətli, təhlükəsiz və fasiləsiz kommunikasiya imkanına sahib olmasını təmin edib.

AzerVoice xəbər verir ki, TÜRKSAT Suriyanın rabitə infrastrukturu və rəqəmsal xidmətlərinin inkişafına dəstək məqsədilə mühüm bir təşəbbüsə imza atıb.

TÜRKSAT-ın baş direktoru Ahmet Hamdi Atalayın rəhbərlik etdiyi nümayəndə heyəti Şamda bir sıra yüksək səviyyəli görüşlər keçirib. Bu çərçivədə Suriya Rabitə və İnformasiya Texnologiyaları naziri Abdüsselam Heykel, İnformasiya naziri Hamza əl-Mustafa və Təcili Yardım və Fəlakətlər üzrə nazir müavini Hussam Hallak ilə görüşlər baş tutub.

Rəsmi danışıqların nəticəsi olaraq, TÜRKSAT Suriyada dövlət sektoruna Ka-Band peyk internet xidmətlərini təqdim etməyə başlayıb.

Şirkət Türksat 5B peyki vasitəsilə verdiyi xidmətlə Suriyanın bir çox strateji nöqtəsində dövlət orqanlarına real vaxt rejimində əlaqə və məlumat axını imkanı yaradıb. Qurulan peyk terminalları vasitəsilə idarələrə fövqəladə vəziyyətlərdə belə fasiləsiz rabitə təmin olunub.

Yalnız internet xidməti ilə kifayətlənməyən TÜRKSAT, eyni zamanda televiziya və radio yayımı, e-hökumət platformaları, fəlakət və təcili rabitə sistemləri, eləcə də xüsusi şəbəkələrə dair tam paket xidmətlər təqdim edir. Bu texnoloji imkanlar Suriyada rəqəmsallaşma prosesinə ciddi təkan verməyi hədəfləyir.

Rabitə sahəsində təqdim olunan bu həllərin, xüsusilə fiber-optik və kabelli şəbəkələrin olmadığı bölgələrdə dövlət xidmətlərinin səmərəliliyini artırması və böhran anlarında operativ əlaqə qurulmasına şərait yaratması nəzərdə tutulur.

TÜRKSAT-ın gələcək planlarına görə, peyk terminallarının Suriyanın digər bölgələrinə də yayılması və daha geniş coğrafiyada tətbiqi təmin ediləcək.