BAKI, AzerVoice
Türkiyə Hərbi Hava Qüvvələrinin 101-ci Havada Yanacaq Doldurma
Eskadronu – “Asenalar” adı ilə tanınan bu strateji birlik ölkənin
hava hücum imkanlarını gücləndirməyə davam edir.
AzerVoice xəbər verir ki, Adana
İncirlikdə yerləşən eskadron KC-135R tipli tanker təyyarələri ilə
döyüş təyyarələrini havada yanacaqla təmin edərək fasiləsiz
uçuşlara şərait yaradır.
Eskadron komandiri, polkovnik Gönen bildirib ki, əsas vəzifə döyüş təyyarələrinin havada qalma müddətini artırmaq, erkən xəbərdarlıq və idarəetmə sistemlərini dəstəkləmək və təyin olunmuş ərazilərdə əməliyyat effektivliyini artırmaqdır. 30 illik təcrübəyə malik “Asenalar” Türkiyənin və NATO-nun bir sıra kritik missiyalarında vacib rol oynayır.
Qeyd edək ki, KC-135R təyyarələri saatda 950 km sürətlə uçaraq F-16 və F-4E/2020 Phantom tipli döyüş təyyarələrinin yanacaq ehtiyacını havada cəmi 3 dəqiqə ərzində qarşılaya bilir. Eyni zamanda, bu təyyarələr 18 tonluq yük və 100-ə qədər şəxsi heyət daşıma qabiliyyətinə malikdir.
Polkovnik Gönen əlavə edib ki, bu strateji təyyarələr yalnız Türkiyə üçün deyil, eyni zamanda NATO və digər müttəfiq ölkələr üçün də vacib hava platforması hesab olunur. Transsərhəd əməliyyatlardan tutmuş beynəlxalq təlimlərə qədər geniş fəaliyyət sahəsi olan eskadronun əsas məqsədi: “Bayrağımızı havada gur və qürurla dalğalandırmaqdır”.
Qeyd edək ki, tanker təyyarəsinin bir dəqiqəyə ötürdüyü yanacaq miqdarı bir avtomobilin illik yanacaq ehtiyacına bərabərdir. Təyyarədə daşına bilən maksimum yanacaq isə 46 illik avtomobil tələbatını ödəyə bilir.
