BAKI, AzerVoice
İranın Ankaradakı səfiri Məhəmməd Həsən Habibullahzadə, “(İsrail-İran toqquşması ilə bağlı) Türkiyədəki bütün qardaşlarımıza bu ədalətsiz və zalım müharibədə bizim yanımızda olduqları üçün təşəkkür edirik,” – deyə bildirib.
AzerVoice xəbər verir ki, Habibullahzadə, Ankarada yerləşən Türkiyə Mətbuat Federasiyasında jurnalistlərlə görüş keçirərək, gündəmdəki məsələlərə dair açıqlamalar verib.
İsrailin İrana qarşı hücumlarında yüksək rütbəli komandirlərin, dinc sakinlərin və elm adamlarının həyatını itirdiyini xatırladan səfir, bu hücumların beynəlxalq hüquq və qanunlara zidd olduğunu vurğulayıb.
İsrailin İrana hücumları ilə başlayan qarşıdurmaların təxminən 12 gün davam etdiyini qeyd edən Habibullahzadə belə deyib:
“Qarşı tərəfin istəyi ilə atəşkəs əldə olundu. Amma bir şeyi də vurğulamaq istəyirəm: biz ‘atəşkəs’ ifadəsini qəbul etmirik. Biz əvvəldən demişdik ki, qarşı tərəf hücumlarını dayandırarsa, biz də eyni şəkildə qarşılıq verərik. Son bir-iki gün ərzində də bildiyiniz kimi, sionist rejimin (İsrail) zəifliyi və səhv hesablamaları nəticəsində ABŞ-dan birbaşa müdaxilə etməsini istədilər. ABŞ da dərhal sionist rejimin köməyinə gələrək müharibəyə birbaşa müdaxilə etdi və İranın nüvə obyektlərini hədəfə aldı. Ardınca isə müxtəlif ölkələri vasitəçi edərək atəşkəsin əldə olunmasını istədilər.”
Hazırda hücumların dayandığını bildirən Habibullahzadə, ölkəsinə qarşı yeni bir hücum olacağı təqdirdə cavab veriləcəyini açıqlayıb.
İranın nüvə obyektlərinə edilən hücumların nüvə silahına malik ölkə və qanunsuz şəkildə nüvə silahı sahibi olan başqa bir ölkə tərəfindən həyata keçirildiyini qeyd edən səfir, Beynəlxalq Atom Enerjisi Agentliyinin (BAEA) İranın fəaliyyətlərini daim nəzarətdə saxladığını bildirib.
Habibullahzadə həmçinin İranın nüvə silahına sahib olmadığını vurğulayaraq, bu təhlükəli hücumun böyük fəlakətlərə yol aça biləcəyini deyib.
Nüvə sızıntısının qarşısının alındığını bildirən Habibullahzadə, bunun qarşısı alınmasaydı, bölgədəki ölkələr üçün böyük bir faciə yaşana biləcəyini qeyd edib.
Səfir əlavə edib ki, nüvə obyektlərinin qorunmasına dair qaydalar pozulub və İran bu məsələ ilə bağlı BMT çərçivəsində hüquqi prosedurlara başlayıb.
