BAKI, AzerVoice
Prezident Ərdoğan Qətərin baş naziri ilə İstanbulda görüşüb.
AzerVoicexəbər verir ki, Prezident Rəcəb Tayyib Ərdoğan İstanbulda keçirilən İslam Əməkdaşlıq Təşkilatının Xarici İşlər Nazirləri Şurasının 51-ci sessiyası çərçivəsində Qətərin Baş naziri və xarici işlər naziri Məhəmməd bin Əbdülrəhman Al-Sani ilə bir araya gəlib.
Görüşdə Türkiyənin xarici işlər naziri Hakan Fidan, Milli İstihbarat Təşkilatının (MİT) rəhbəri İbrahim Kalın və Prezidentin xarici siyasət və təhlükəsizlik üzrə baş müşaviri Akif Çağatay Kılıç da iştirak ediblər. Tərəflər bölgədəki son prosesləri, regional təhlükəsizlik məsələlərini və ikitərəfli əməkdaşlıq imkanlarını müzakirə ediblər.
Ərdoğan həmçinin BMT-nin Sivilizasiyalar Alyansı üzrə ali nümayəndəsi Migel Anxel Moratinosu da qəbul edib. Bu görüş də sammitin keçirildiyi məkanda – Lütfi Kırdar Konqres Mərkəzində baş tutub.
Qeyd edək ki, İstanbulda keçirilən İƏT toplantısı regional diplomatiya baxımından əhəmiyyətli görüşlərə və beynəlxalq əməkdaşlıq təşəbbüslərinə səhnə olur. Qətər və Türkiyə arasındakı strateji münasibətlər isə həm regional sabitlik, həm də enerji və iqtisadi əməkdaşlıq baxımından xüsusi önəm daşıyır.
