BAKI, AzerVoice
ABŞ administrasiyası, İranın nüvə obyektlərinə hava zərbələri endirməsinə baxmayaraq, ölkənin özü ilə müharibədə olmadığını bildirir.
AzerVoice xəbər verir ki, bu haqqda ABŞ vitse-prezidenti Cey Di Vens "NBC News" telekanalına açıqlama verib.
“Biz İranla müharibə aparmırıq. Biz İranın nüvə proqramı ilə mübarizə aparırıq” – deyə, o bildirib.
Digər tərəfdən, ABŞ dövlət katibi Marko Rubio "Fox News"a verdiyi müsahibədə bu məsələni daha da aydınlaşdırıb:
“Xeyr, biz İranla müharibə vəziyyətində deyilik. Bu, İran dövlətinə qarşı müharibə deyil. Məsələ olduqca sadədir. 67 gün əvvəl ABŞ Prezidenti Donald Tramp İran tərəfinə məktub göndərdi və bildirdi: ‘Sizdə nüvə silahı olmayacaq. Hərbiləşdirilmiş nüvə proqramı olmayacaq. Gəlin danışıqlar aparaq. Mən bunu diplomatik və dinc yolla etmək istəyirəm.’ Onlar bu təklifi oyun kimi qəbul etdilər. Trampa qarşı oynamağa çalışdılar. Əslində, onlar son 35 ildə hər bir amerikalı prezidentlə eyni cür davranıblar” – deyə, Rubio vurğulayıb.
Qeyd edək ki, ABŞ Hərbi Hava Qüvvələri iyunun 22-ə keçən gecə İran ərazisində yerləşən Fordo, Nətənz və İsfahan nüvə obyektlərinə hava zərbələri endirib. Hücum nəticəsində hər üç nüvə obyektinin məhv edildiyi qeyd olunub.
