BAKI, AzerVoice
Türkiyənin xarici işlər naziri Hakan Fidan Rusiya paytaxtı Moskvada keçirdiyi görüşlərdən sonra verdiyi açıqlamada, Rusiya-Ukrayna müharibəsinə dair müzakirələrin gələcəkdə sürətli şəkildə atəşkəsə və ardınca daimi sülhə çevriləcəyinə ümid etdiklərini bildirib.
AzerVoice xəbər verir ki, Fidan qeyd edib ki, Rusiya Prezidenti Vladimir Putin tərəfindən yetkiləndirilən nümayəndə heyətinin İstanbulda keçirilən danışıqlarda iştirak etməsi nəticəsində müəyyən müsbət nəticələr əldə olunub.
O, bu danışıqlar çərçivəsində razılaşdırılmış əsir mübadiləsinin ötən həftə sonu tamamlanmasından məmnun olduqlarını da vurğulayıb.
Hakan Fidan, Rəcəb Tayyib Ərdoğanın daha əvvəl bütün tərəflərə bildirdiyi kimi, Türkiyənin bu prosesdə hər cür dəstək göstərməyə hazır olduğunu bir daha təsdiqlədiyini qeyd edib.
“Buradakı təmaslarım zamanı da növbəti görüşlərə ev sahibliyi etməyə hazır olduğumuzu ifadə etdim. Bundan əlavə, Qara dənizdə dəniz təhlükəsizliyinə verdiyimiz önəmi bir daha vurğuladım. Bu məsələdə də rusiyalı dostlarımızla əlaqədə qalacağıq”- deyə o bildirib.
