BAKI, AzerVoice
Yeni seçilmiş Papa XIV Leo, Türkiyəyə rəsmi səfər üçün dəvəti qəbul edib.
AzerVoice xəbər verir ki, səfərin noyabr ayının sonunda xristian ortodoks dünyası üçün əhəmiyyətli olan Aziz Andreas Yortusuna təsadüf edən tarixlərdə baş tutması planlaşdırılır.
Səfər, həmçinin xristian dünyası üçün böyük tarixi əhəmiyyətə malik Birinci İznik Konsilinin 1700-cü ildönümünə təsadüf edir. Həmin konsil eramızın 325-ci ilində keçirilib və müasir xristian etiqadının əsasını qoyub.
Papa XIV Leo, 8 may tarixində kardinal seçkilərindən sonra Katolik Kilsəsinin ruhani lideri və Vatikan dövlətinin başçısı olaraq vəzifəyə başlamışdı. O, bazar günü keçirilən rəsmi mərasimdə Fənər Rum Patriarxı I Bartholomeos və patriarx heyəti ilə bir araya gəlib. Bartholomeos bu görüşdə Papa Leo-ya Türkiyəyə səfərlə bağlı rəsmi dəvəti təqdim edib.
Vatikan bu tarixi nəzərdən keçirsə də, səfərin noyabr ayından daha erkən baş verməsi də mümkündür. Ziyarətin “dövlət səfəri” statusunda həyata keçirilməsi üçün Türkiyə Prezidenti Rəcəb Tayyib Ərdoğanın Papa XIV Leo-ya rəsmi dəvət məktubu göndərməsi tələb olunur.
Planlaşdırmaya əsasən, Papa XIV Leo ilk olaraq Ankarada Prezident Ərdoğanla görüşəcək, ardından isə İstanbul və İznikə səfər edəcək. İznik, həmçinin Papa Francesco-nun da səfər etməyi arzuladığı məkan olub. Məlumata görə, Papa Francesco 2025-ci ildə qeyd olunacaq İznik Konsili yubileyinə qatılmağı çox istəsə də, səhhətindəki problemlərə görə bu mümkün olmayıb.