BAKI, AzerVoice, Fərid Mikayılov
İsrailin müdafiə naziri İsrael Katz, ordunun Qəzza şəhərinə qarşı hücumları genişləndirməyə hazırlandığını bildirərək, bu gün bölgədə “şiddətli hücumlar” həyata keçiriləcəyini bəyan edib.
AzerVoice xəbər verir ki, Katz, ABŞ mərkəzli X sosial media platformasında yazdığı paylaşımda, Qəzzadakı çoxmərtəbəli binaların və digər tikililərin hədəfə alınacağını açıqlayıb.
O, HƏMAS-dan israilli əsirləri və silahlarını təhvil verməsini tələb edərək, “Əks halda Qəzza da, siz də məhv ediləcəksiniz” sözləri ilə hədələyib.
Nazir həmçinin bildirib ki, İsrail ordusu dünən Qəzza şəhərində 50 binanı tamamilə, 100 binanı isə qismən dağıdıb və hücumların miqyasını artırmaq üçün hazırlıqlar aparır.
Xatırladaq ki, İsrail Təhlükəsizlik Kabineti avqustun 8-də Qəzza şəhərinin işğalı planına yaşıl işıq yandırmışdı. Plana əsasən:
- İlk mərhələdə təxminən 1 milyon fələstinli şəhərin cənubuna köçürüləcək,
- Qəzza tam mühasirəyə alınacaq, intensiv bombardmanlardan sonra şəhərin işğalı həyata keçiriləcək,
- Daha sonra şəhərin mərkəzindəki qaçqın düşərgələri hədəfə alınacaq.
- Çoxmərtəbəli binalar ardıcıl vurulur
İsrail ordusu son üç gündə Qəzzada mülki insanların yaşadığı çoxmərtəbəli binaları dağıdıb:
- 5 sentyabrda “Müştəha”,
- 6 sentyabrda “Əs-Susi”,
- 7 sentyabrda isə “Ər-Ru’ya” adlı binalar raket zərbələri ilə yerlə-yeksan edilib.
Hücumlar nəticəsində yüzlərlə fələstinlinin məskunlaşdığı binalar dağıdılıb, ətrafdakı çadır və tikililər də ağır ziyan görüb. Məqsədin fələstinliləri şəhərin cənubuna köçməyə məcbur etmək olduğu bildirilir.
İsrailin baş naziri Benyamin Netanyahu hökumətin həftəlik iclasında çıxış edərək, Qəzza şəhərinin işğalı üçün hücumların intensivləşdirildiyini təsdiqləyib. Onun sözlərinə görə, indiyədək 100 min fələstinli zorla evlərindən çıxarılıb.
