Bakı, AzerVoice

Bolu Kartalkaya Xizək Mərkəzində 78 nəfərin həyatını itirdiyi oteldə baş verən yanğınla bağlı iş üzrə saxlanılanların sayı artıb.

AzerVoice xəbər verir ki, istintaq çərçivəsində otel sahibi Halit Ergül və şirkətin baş direktoru Emir Aras da daxil olmaqla ümumilikdə 9 nəfər həbs edilib.

Yanvarın 21-də Grand Kartal otelində baş verən yanğınla bağlı aparılan araşdırmalar nəticəsində otel müdiri Zeki Yılmaz, mühasibat müdiri Kadir Özdemir, aşpaz Faysal Yaver, elektrik ustası Hüseyn Özer və mətbəx işçiləri Yusuf Karahanlı, Fidan Kurç və Mehmet Gündüz də həbs edilib. İş çərçivəsində əməyin mühafizəsi üzrə ekspert E.K. məhkəmə nəzarəti şərti ilə azadlığa buraxılıb.

Saxlanılan digər 4 nəfərin isə jandarmadakı əməliyyatları davam edir.

Ədliyyə Nazirliyi tərəfindən təyin olunmuş İstanbul Texniki Universitetinin (İTÜ) nümayəndə heyəti yanğın yerində ikinci dəfə araşdırma aparıb. Prokurorların da iştirak etdiyi araşdırma zamanı nümayəndə heyəti, jandarm, xilasetmə və AFAD əməkdaşlarının müşayiəti ilə təxminən 3,5 saatlıq yoxlama həyata keçirib. Araşdırmalar nəticəsində əldə edilən sübutlar toplanaraq təhlil üçün götürülüb.

Qeyd edək ki, Boludakı yanğında xəsarət alan 44 nəfərin xəstəxanadan evə buraxıldığı, 6 nəfərin isə müalicəsinin davam etdiyi bildirilib. Nazirlikdən verilən açıqlamada, xəsarət alanların vəziyyətinin yaxından izlənildiyi qeyd edilib.

Hadisə ilə bağlı istintaq hələ də davam edir.