BAKI, AzerVoice, Fərid Mikayılov

Mançester Yunayted klubunun azlıq səhmdarı və INEOS şirkətinin sahibi Jim Ratklif, Fransanın Nitsa klubunu satışa çıxarmağa hazırlaşır.

AzerVoice xəbər verir ki, klubun satış qiyməti təxminən 200 milyon avro olaraq müəyyən edilib və rəsmi açıqlamanın yaxın günlərdə verilməsi gözlənilir.

Ratklif 2019-cu ildə Nitsanı təxminən 100 milyon avro (89 milyon funt) qarşılığında almışdı. Lakin bu müddətdə klubun inkişafında gözlənilən addımların atılmaması səbəbindən milyarder tez-tez tənqid edilib. O, hətta mart ayında verdiyi açıqlamada “Nitsa oyunlarını izləməkdən zövq almıram, futbol səviyyəsi mənim üçün kifayət qədər həyəcanverici deyil” sözləri ilə gündəm olmuşdu.

Baş məşqçi Franck Haise isə həmin vaxt Ratklifin mövsüm ərzində komandanın oyununu izləmədiyini açıqlamışdı.

Satışla bağlı yayılan xəbərlərdə Səudiyyə Ərəbistanının Dövlət İnvestisiya Fondu (PIF)nun Nitsaya maraq göstərə biləcəyi qeyd olunur. Maraqlı tərəflərin yaxın həftələrdə rəsmi addımlar atacağı gözlənilir.

Ratklifin diqqəti hazırda əsasən Mançester Yunayteddəki vəziyyətə yönəlib. Komanda son 33 ilin ən zəif mövsüm startını edib və baş məşqçi Ruben Amorimin mövqeyi ciddi şəkildə sual altındadır. İngiltərə mətbuatına görə, Amorimin postunu qoruması üçün cəmi üç oyun şansı qalıb. Əgər vəzifəsindən uzaqlaşdırılarsa, klub onun müqaviləsinə görə 12 milyon funt təzminat ödəməli olacaq.Q