BAKI, AzerVoice, Nailə Babazadə

İstanbuldan Ciddəyə uçmaq üçün hazırlıq görən sərnişin təyyarəsində bir sərnişinin “təyyarədə bomba var” deməsi panikaya səbəb olub. Hadisə ilə bağlı təyyarəyə çağırılan polis qrupları tərəfindən aparılan axtarışlar nəticəsində həyəcan siqnalının əsassız olduğu müəyyən edilib.

AzerVoice xəbər verir ki, İstanbul Hava Limanından SV278 reysi ilə Ciddəyə uçmağa hazırlaşan Saudia Airlines şirkətinə məxsus Airbus A321 tipli sərnişin təyyarəsində bomba xəbəri yayılıb. Uçuşdan əvvəl sərnişinlər arasında olan bir nəfərin “təyyarədə bomba var” deməsi nəticəsində kabin heyəti dərhal məsələni kapitan pilota çatdırıb.

Kapitan pilot hadisə barədə hava hərəkəti idarəetmə mərkəzinə məlumat verib və polis qüvvələri təyyarəyə çağırılıb. Təyyarənin salonu və yük bölməsi xüsusi bomba axtarış iti ilə yoxlanılıb, bütün baqajlar yenidən mobil X-Ray cihazından keçirilərək nəzarətdən keçirilib.

İddianı səsləndirən sərnişin polis tərəfindən təyyarədən endirilib. Aparılan yoxlamalardan sonra bomba xəbərinin əsassız olduğu müəyyənləşib. Hadisə səbəbindən uçuş gecikmə ilə həyata keçirilib.