BAKI, AzerVoice, Nailə Babazadə

Suriyanın Prezidenti Əhməd Əş-Şəraa, Səudiyyə Ərəbistanının region üçün “böyük əhəmiyyətə” malik olduğunu bildirərək, Krallığı “Suriyanın dünyaya açılan açarı” adlandırıb.

AzerVoice xəbər verir ki, Əş-Şəraa bu fikirləri 29 oktyabr 2025-ci ildə Ər-Riyadda keçirilən 9-cu “Future Investment Initiative” (FII9) forumunun plenar iclasında səsləndirib. Tədbirdə Səudiyyə Ərəbistanının vəliəhdi və baş naziri Şahzadə Məhəmməd bin Salman da iştirak edib.

Prezident çıxışında qeyd edib ki, təhlükəsizlik və sabitlik iqtisadi inkişafla sıx bağlıdır.

“Bu, bu gün Səudiyyə Ərəbistanının təmsil etdiyi dəyərdir.” - deyə Şəraa qeyd edib.

Əş-Şəraa əlavə edib ki, vəliəhd şahzadə Məhəmməd bin Salmanın rəhbərliyi ilə formalaşan yeni iqtisadi baxış sayəsində Səudiyyə Ərəbistanı region iqtisadiyyatının əsas mərkəzinə çevrilib.

“Bizim ilk xarici səfərimiz Səudiyyə Ərəbistanına oldu, çünki anlayırıq ki, dünyanın açarı burada – Krallıqdadır.” - deyə ŞƏraa vurğulayıb.

O, həmçinin qeyd edib ki, Suriyanın sabitliyi regionun ümumi sabitliyi üçün həyati əhəmiyyət daşıyır və bu sabitlik yalnız iqtisadi inkişafla təmin oluna bilər.

“Dünya son 14 ildə Suriyanın uğursuzluğunu gördü, lakin bu gün ölkə dost dövlətlərin, xüsusilə də Səudiyyə Ərəbistanının dəstəyi ilə yeni bir səhifə açıb və regional mövqeyini bərpa etməyə başlayıb,” — deyə Əş-Şəraa vurğulayıb.

Prezident bildirib ki, Suriya investisiya qanunlarını yeniləyib və nəticədə ilk altı ayda 28 milyard dollarlıq investisiya cəlb edib.

Onun sözlərinə görə, ölkədə daşınmaz əmlak, turizm və kənd təsərrüfatı sahələrində geniş imkanlar mövcuddur.

“Suriyanın bərpasının yolu investisiyalardan keçir və mən xalqıma inanıram. Biz yardımlara arxalanmayacağıq, özümüzü investisiya ilə bərpa edəcəyik.” - deyə qeyd edib.