BAKI, AzerVoice, Səməd Əyyubov
Türkiyənin “Beşiktaş” klubu Almaniyanın “Volfsburq” komandasında çıxış edən 27 yaşlı çexiyalı cinah oyunçusu Vatslav Çernı ilə razılığa gəlib.
AzerVoice-un məlumatına görə, futbolçu ilə 3+1 illik müqavilə imzalanacaq. Keçid üçün “Beşiktaş”ın 6–7 milyon avro civarında ödəniş edəcəyi və bu məbləği 2029-cu ilə qədər hissə-hissə ödəyəcəyi bildirilib.
Hazırda Çexiya millisinin düşərgəsində olan Çernı bu gün İstanbula gələrək tibbi müayinədən keçəcək və müqaviləyə imza atacaq. “Beşiktaş” oyunçunun bu axşam yerli vaxtla saat 23:05-də (Bakı vaxtı ilə 00:05-də) İstanbulda olacağını açıqlayıb.
Xatırladaq ki, Çernı ötən mövsümü icarə əsasında “Reyncers”də keçirib. O, 52 oyunda 18 qol və 9 məhsuldar ötürmə ilə yadda qalıb. UEFA Avropa Liqasının “Fənərbağça” ilə İstanbulda keçirilən oyununda isə 2 qol vuraraq azarkeşlərin rəğbətini qazanmışdı.
Daha əvvəl “Tvente”də çıxış edən futbolçu 8 milyon avroya “Volfsburq”a transfer olunmuşdu. Ümumilikdə karyerası ərzində 313 oyunda meydana çıxan Çernı 101 qol vurub və 69 məhsuldar ötürmə ilə yadda qalıb.