BAKI, AzerVoice, Nailə Babazadə

Trendyol Süper Liqasında mövsümə qalibiyyətlə başlayan Qalatasaray, azarkeşlərinin qarşısına ilk dəfə Fatih Karagümrük oyunu ilə çıxır.

AzerVoice xəbər verir ki,İstanbul təmsilçisi, çempionatın 2-ci həftəsində öz meydanında – RAMS Park stadionunda Fatih Karagümrük komandasını qəbul edəcək. Qarşılaşma bu axşam saat 21:30-da start götürəcək.

Son 3 mövsümün ardıcıl çempionu olan Qalatasaray, yeni mövsümə də uğurlu start verib – ilk turda səfərdə Gaziantep FK üzərində 3:0 hesablı qələbə qazanıb.

Bir illik fasilədən sonra Süper Liqaya qayıdan Fatih Karagümrük, bu mövsümdə ilk rəsmi oyununa çıxacaq. Onların ilk turda keçirilməli olan Başakşehir qarşılaşması, rəqibin Avropa kuboklarında iştirakına görə TFF tərəfindən təxirə salınmışdı.

Qalatasaray mövsümöncəsi hazırlıqlarda evdə Strasbourgu 3-1 hesabı ilə məğlub edib, Lazio ilə isə 2-2 bərabərə qalıb.

Qalatasaray evdə keçirdiyi son 18 liqa oyununda məğlub olmayıb. Komanda bu qarşılaşmalarda 15 qələbə, 3 bərabərlik əldə edib, 46 qol vurub və yalnız 15 qol buraxıb. Evdə sonuncu məğlubiyyət isə 2023/2024 mövsümünün 37-ci turunda Fenerbahçe ilə oyuna təsadüf edib (0-1).

Galatasaray, sonuncu dəfə keçən mövsüm Beşiktaşa qarşı oynadığı 29-cu tur oyununda məğlub olub. O vaxtdan bəri keçirdiyi 12 rəsmi oyunun hamısında qələbə qazanıb.