BAKI, AzerVoice, Fərid Mikayılov

Qalatasaray baş məşqçisi Okan Buruk, yay transfer pəncərəsinin son günlərində İnterin yarımmüdafiəçisi Hakan Çalhanoğlunu heyətə qatmaq üçün cəhd etdiklərini, lakin müqavilənin baş tutmadığını açıqlayıb.

AzerVoice xəbər verir ki, Qalatasaray rəhbərliyi ötən həftə Çalhanoğlu üçün son addımı atsa da, Milan klubu transferi bloklayıb.

İnter tərəfi oyunçu üçün 40–45 milyon avro qiymət qoyub ki, bu məbləğ Qalatasaray üçün əlçatmaz olub.

Buruk bildirib ki, türk futbolçusu transferin reallaşması üçün maaşını azaltmağa razılıq verib.

"Çalhanoğlu böyük fədakarlıq etməyə hazır idi, maaşından imtina edəcəkdi. Amma İnter yalnız normal bazar qiymətindən yuxarı bir təklif olarsa satmağa razı olacağını dedi. Bu da bizim üçün mümkün olmadı"- deyə o bildirib.

Türkiyə millisinin kapitanı olan 31 yaşlı futbolçu uzun müddətdir Qalatasaray və Fənərbağçanın maraq dairəsində idi. Lakin rəsmi təkliflərin olmaması İnter rəhbərliyini narazı salmışdı. Çalhanoğlu həmçinin kapitan Lautaro Martineslə yaşadığı gərginlik və zədələrinin yenilənməsi ilə diqqət çəkmişdi.

Bütün söz-söhbətlərə baxmayaraq, Çalhanoğlu yaxın vaxtlarda İnterdə qalacaq. Klubun baş məşqçisi Simone İnzaqi onun bu mövsüm A seriyasında çempionluq mübarizəsində əsas fiqur olacağını planlaşdırır.