BAKI,AzerVoice, Fərid Mikayılov

Trendyol Super Liqanın 8-ci turunda Qalatasaray ilə Beşiktaş arasında RAMS Parkda keçiriləcək böyük derbi öncəsi hər iki komandanın baş məşqçiləri Okan Buruk və Sərgən Yalçının derbi performansları diqqət mərkəzinə çıxıb.

AzerVoice xəbər verir ki, Qalatasaray, Okan Burukun başçılığı altında Beşiktaşa qarşı əhəmiyyətli üstünlük əldə edib.

Burukun rəhbərliyi ilə oynanan 6 liqa matçında “Cimbom” 4 qələbə qazanıb, 2 dəfə məğlub olub. Bu oyunlarda sarı-qırmızılılar 9 qol vurub, 8 qol buraxıb.

Fənərbaxçaya qarşı isə Okan Buruk 6 liqa qarşılaşmasında 3 qələbə, 2 heç-heçə və 1 məğlubiyyət yaşayıb. Onun komandası bu matçlarda 9 qol vurub, cəmi 2 qol buraxıb.

Beşiktaşın çalışdırıcısı Sergen Yalçın, Qalatasarayla liqada indiyədək 4 dəfə üz-üzə gəlib. Bu matçların nəticəsi 2 qələbə, 1 heç-heçə və 1 məğlubiyyət olub. Yalçının komandası bu oyunlarda 5 qol vurub, 4 qol buraxıb.

Sərgən Yalçın rəhbərliyində Beşiktaş Fənərbaxçaya qarşı məğlubiyyət yaşamayıb. Üç qarşılaşmanın ikisində qalib gələn “qara-ağlılar” bir oyunda heç-heçə edib. Bu görüşlərdə Beşiktaş 7 qol vurub, 4 qol buraxıb.

Okan Buruk və Sərgən Yalçının bir-birinə qarşı məşqçi olaraq qarşılaşmalarında üstünlük Yalçındadır. Burukun çalışdırdığı Qalatasaray, Elazığspor, Rizespor və Başakşəhər kimi komandalarla Yalçının rəhbərlik etdiyi klublara qarşı 2 qələbə, 2 heç-heçə və 4 məğlubiyyət yaşayıb, ümumilikdə 9 qol vurub.

Beləliklə, bu dəfəki derbi yalnız liqa xal cədvəli baxımından deyil, həm də iki məşqçinin şəxsi karnelərinin davamı kimi böyük əhəmiyyət daşıyır.