BAKI, AzerVoice, Nailə Babazadə

Türkiyə Super Liqasının 6-cı turunda Qalatasaray öz meydanında Konyasporu 3:1 hesabı ilə məğlub edərək liqada ardıcıl altıncı qələbəsini qazandı.

AzerVoice xəbər verir ki, RAMS Park stadionunda keçirilən qarşılaşmada hesabı 23-cü dəqiqədə Yunus Akgün açdı. Bu, 25 yaşlı futbolçunun ardıcıl üçüncü rəsmi oyunda vurduğu qol oldu. O, daha əvvəl Eyüpspor (Super Liqa) və E. Frankfurt (Çempionlar Liqası) qarşısında da fərqlənmişdi.

İlk hissənin əlavə olunmuş dəqiqələrində Yunus Akgünün ötürməsini dəqiq tamamlayan Mauro İkardi fərqi artırdı. Bu, argentinalı hücumçunun liqada ardıcıl üçüncü matçda qol vurması ilə yadda qaldı. Bununla da Qalatasaray liqada ardıcıl 14-cü qarşılaşmasında ən azı 2 qol vurma seriyasını davam etdirdi.

Fasiləyə 2:0 hesabı ilə yollanan ev sahibləri ikinci hissəyə də sürətli başladı. 64-cü dəqiqədə Lukaş Torreyra komandasının üçüncü qoluna imza atdı və bu, onun mövsümdə ilk qolu oldu.

Konyaspor isə 80-ci dəqiqədə Umut Nayirin qolu ilə hesab arasındakı fərqi azaltsa da, bu, oyunun nəticəsinə təsir etmədi.

Qarşılaşma Qalatasarayın 3:1 hesablı qələbəsi ilə başa çatdı. Beləliklə, Okan Burukun rəhbərlik etdiyi komanda 18 xalla Super Liqada liderliyini davam etdirdi. Növbəti turda Qalatasaray səfərdə Alanyasporla qarşılaşacaq. 7 xalı olan Konyaspor isə Başakşəhiri qəbul edəcək.

Rekord seriya davam edir

Ötən mövsüm liqadakı son 8 oyununu qazanan Qalatasaray, bu mövsüm də 6-da 6 edərək ümumi qələbə seriyasını 14-ə çatdırdı. Bu nəticə ilə İstanbul təmsilçisi 2022-ci ilin oktyabrı ilə 2023-cü ilin mart ayları arasında əldə etdiyi Super Liqa tarixinin ikinci ən uzun qələbə seriyasını təkrarladı.

Qalatasaray bu göstəricidə liqa rekorduna da sahibdir – 2024-cü ilin yanvar-may ayları arasında ardıcıl 17 qələbə ilə.