BAKI, AzerVoice, Nailə Babazadə

Türkiyənin tanınmış klublarından Fənərbaxça, 28 yaşlı cinah oyunçusu Cengiz Ünderin satın alma opsiyası ilə Beşiktaş klubuna icarəyə verildiyini açıqlayıb.

AzerVoice xəbər verir ki, Fənərbaxça klubunun yaydığı rəsmi məlumatda transferin mövsüm sonuna qədər keçərli olduğu bildirilib.

Cengiz Ünder peşəkar futbol karyerasına Altınordu klubunun altyapısında başlayıb. 2016-17 mövsümündə İstanbul Başakşəhərə transfer olunan oyunçu, burada keçirdiyi 43 qarşılaşmada 9 qol və 5 məhsuldar ötürmə ilə yadda qalıb. Bu uğurlu çıxışın ardından o, təxminən 14 milyon avroya İtaliyanın Roma klubuna transfer olunub.

Roma ilə keçirdiyi üç mövsüm ərzində Cengiz Ünder 88 oyunda meydana çıxaraq 17 dəfə rəqib qapılarına yol tapıb. 2020-21 mövsümündə Premyer Liqa təmsilçisi Leicester City-yə icarəyə verilən futbolçu burada 19 matçda 2 qol və 5 asistlə çıxış edib.

Bir il sonra Fransanın Marsel klubuna keçən Cengiz, əvvəlcə icarə əsasında, daha sonra isə 11.4 milyon avroya bu kluba transfer olunub. Marsel forması ilə ümumilikdə 46 oyuna çıxan futbolçu, 5 qol və 4 məhsuldar ötürmə ilə komandasına töhfə verib.

2023-24 mövsümündə Fənərbaxçaya transfer olunan Cengiz Ünder, sarı-mavili formanı 33 dəfə geyinib, 9 qol vurub və 2 məhsuldar ötürmə verib. Növbəti mövsümdə isə ABŞ-ın MLS liqasında mübarizə aparan Los Angeles klubuna icarəyə göndərilib. Burada keçirdiyi 16 oyunda 2 qolla yadda qalıb.

Hazırda Beşiktaş heyətinə qoşulan Cengiz Ünderin İstanbul təmsilçisindəki çıxışı maraqla gözlənilir.