BAKI,AzerVoice

Azərbaycan və İordaniya arasında gömrük işi sahəsində əməkdaşlıq və qarşılıqlı yardım həyata keçiriləcək.

AzerVoice-in məlumatına görə, bununla bağlı məsələ Milli Məclisin bugünkü plenar iclasında müzakirə edilib.

Bildirilib ki, “Azərbaycan Respublikası Hökuməti ilə İordaniya Haşimilər Krallığı Hökuməti arasında gömrük işi sahəsində əməkdaşlıq və qarşılıqlı yardım haqqında Saziş” 2025-ci il noyabrın 27-də Bakı şəhərində imzalanıb.

22 maddədən ibarət olan saziş müəyyən edilmiş qaydalara və şərtlərə uyğun olaraq hər iki Tərəfin gömrük orqanları arasında gömrük qanunvericiliyinin düzgün şəkildə tətbiqinin təmin edilməsi, bu qanunvericiliyin pozulmasının qarşısının alınması, aşkar edilməsi və araşdırılması vasitəsilə bir-birlərinə yardım edilməsini nəzərdə tutur.

Sazişdə tərəflərin qeyd olunan bu məsələlərlə əlaqədar olaraq müvafiq orqanının sorğusu əsasında zəruri məlumatları təqdim etməsi, zəruri hesab edilən məlumatları təqdim etməklə könüllü yardımın edilməsi, texniki yardım, həssas malların qanunsuz dövriyyəsi barədə məlumat, nəzarətli göndəriş, yardım üçün sorğunun forma və məzmunu, sorğuların icra qaydası, istisnalar, konfidensiallıq, məlumatlardan istifadə qaydası və s. məsələlərə dair zəruri müddəalar əks olunub.

Sazişin digər müddəaları qüvvəyə minmə, müddət, ləğvetmə və digər əlaqədar məsələləri tənzimləyir.

Qeyd edilib ki, Azərbaycan Respublikası tərəfindən əvvəlki illərdə oxşar sazişlər Səudiyyə Ərəbistanı Krallığı, Mərakeş Krallığı, Montenegro, Küveyt Dövləti Hökuməti, Birləşmiş Ərəb Əmirlikləri, Makedoniya, İsrail, Serbiya, Argentina və bir sıra digər ölkələrlə də imzalanıb.

"Azərbaycan Respublikası Hökuməti ilə İordaniya Haşimilər Krallığı Hökuməti arasında gömrük işi sahəsində əməkdaşlıq və qarşılıqlı yardım haqqında Saziş"in təsdiq edilməsi barədə qanun layihəsi müzakirələrdən sonra səsverməyə çıxarılaraq bir oxunuşda qəbul edilib.