BAKI, AzerVoice, Orxan Qədirzadə

Bir sıra ərəb və İslam ölkələri ABŞ Prezidenti Donald Trampın təşəbbüsü ilə yaradılan Qəzza üzrə “Sülh Şurası”na qoşulmaq barədə birgə qərar qəbul edib.

AzerVoice xəbər verir ki, Səudiyyə Ərəbistanı, Türkiyə, Misir, İordaniya, İndoneziya, Pakistan, Qətər və Birləşmiş Ərəb Əmirliklərinin xarici işlər nazirləri yaydıqları birgə bəyanatda ölkələrinin “Sülh Şurası”na üzv olmaq qərarını açıqlayıblar. Bildirilib ki, hər bir dövlət üzvlüklə bağlı sənədləri öz milli hüquqi prosedurlarına uyğun şəkildə imzalayacaq. Qeyd edək ki, Misir, Pakistan və Birləşmiş Ərəb Əmirlikləri bu qərarı daha əvvəl elan etmişdi.

Nazirlər bəyanatda ölkələrinin ABŞ Prezidenti Donald Trampın rəhbərliyi ilə həyata keçirilən sülh səylərinə dəstəyini bir daha təsdiqləyib və Şuranın Qəzza münaqişəsinin sona çatdırılmasına dair BMT Təhlükəsizlik Şurasının 2803 saylı qətnaməsi ilə təsdiqlənmiş ümumi plan çərçivəsində keçid mexanizmi kimi fəaliyyətini dəstəkləməyə sadiq olduqlarını vurğulayıblar.

Məlumata görə, “Sülh Şurası”nın əsas məqsədi Qəzzada daimi atəşkəsin təmin olunması, bölgənin bərpasına dəstək verilməsi, həmçinin beynəlxalq hüquqa uyğun şəkildə Fələstin xalqının öz müqəddəratını təyin etmə hüququnun və dövlət qurmaq haqqının təmin olunmasına əsaslanan ədalətli və davamlı sülhün təşviq edilməsidir. Bu prosesin regionda təhlükəsizlik və sabitliyə yol açacağı qeyd olunur.

Eyni zamanda, Mərakeş Xarici İşlər Nazirliyi bazar ertəsi yaydığı bəyanatda ölkə kralı VI Məhəmmədin Donald Trampın “Sülh Şurası”na təsisçi üzv qismində qoşulmaq dəvətini qəbul etdiyini açıqlayıb. Bildirilib ki, Rabat Şuranın təsis sənədlərinin ratifikasiyası istiqamətində zəruri addımlar atacaq.