BAKI, AzerVoice
Səudiyyə Ərəbistanının Xarici İşlər Nazirliyi Pakistan ilə Hindistan arasında əldə olunan atəşkəs razılaşmasını alqışlayıb.
AzerVoice xəbər verir ki, bu barədə nazirliyin verdiyi açıqlamada deyilir.
Açıqlamada, Səudiyyə Ərəbistanı XİN bu razılaşmanın bölgədə təhlükəsizlik və sülhün bərpasına gətirib çıxaracağına ümid etdiyini bildirib.
Açıqlamada həmçinin, hər iki tərəfin təmkin nümayiş etdirməsi yüksək qiymətləndirilib.
Qeyd edək ki, ABŞ prezidenti Donald Tramp Hindistan və Pakistanın atəşkəs barədə razılığa gəldiyini açıqlayıb. Pakistanın Xarici İşlər Naziri Məhəmməd İshaq Dar da iki dövlətin atəşkəs haqqında anında razılaşdıqlarını bildirib.
Həmçinin qeyd edək ki, Ər-Riyad Hindistan və Pakistan arasında baş vermiş gərginliyin ardından atəşkəsin əldə olunması istiqamətində göstərilən səylərdə iştirak edib. Bu təşəbbüs, Səudiyyə Ərəbistanının regional və beynəlxalq miqyasda gərginliyin azaldılması, böhranların həllində qardaş və dost ölkələrlə sıx əməkdaşlıq yolu ilə daha sabit və rifahlı bir dünya naminə göstərdiyi səylərin tərkib hissəsidir.
