BAKI, AzerVoice, Nailə Babazadə

Səudiyyə Ərəbistanı Əl-Qasım bölgəsi gənclərin innovativ təşəbbüsləri sayəsində öz autentik keçmişini bərpa edir. Belə ki, qədim evlər və kənd təsərrüfatı fermaları yenidən qurularaq ilboyu turist qəbul edən canlanmış irs məkanlarına çevrilib.

AzerVoice xəbər verir ki, Səudiyyə Ərəbistanının Vizyon 2030 strategiyasına uyğun olaraq bu təşəbbüslər həm milli kimliyin qorunmasını, həm də daxili turizmin inkişafını hədəfləyir və bölgənin mədəni və iqtisadi dəyərini artırır. Səudiyyə Mətbuat Agentliyinin məlumatına görə, bu proses həm ənənə, həm də müasirliyin birləşməsi ilə həyata keçirilir.

Bölgənin paytaxtı Bureydə və digər qəsəbələrdə bir çox qədim tikili bərpa edilərək ənənəvi üslubda kafelərə, restoranlara və qonaq evlərinə çevrilib. Bu isə yerli irsi yaxından tanımaq istəyən ziyarətçilərin sayını artırıb.

İrs üzrə ekspert Şakir əl-Humeyd bildirib ki, son illərdə qədim ev və fermaların bərpasına maraq yüksəlib və bu məkanlar artıq unikal qonaq qəbul mərkəzlərinə, muzeylərə və mədəniyyət obyektlərinə çevrilib. Onun sözlərinə görə, bu layihələr yalnız əcdad mirasını qorumaqla kifayətlənmir, həm də kənd turizmini inkişaf etdirir.

Əl-Humeyd əlavə edib ki, gənclər arasında milli irsə artan maraq nəticəsində xalq sənətləri, ənənəvi mətbəx və əl işləri yenidən canlandırılır və turistlərə Əl-Qasımın kimliyini və tarixi köklərini əks etdirən mədəni təcrübə təqdim olunur.

Bu təşəbbüslər köhnə məhəllələrin dirçəlməsinə, ənənəvi kərpic memarlığının və dekorativ elementlərin qorunmasına səbəb olub və bölgənin kimliyini əks etdirən fərqli turizm mühiti yaradıb. Yerli sakinlərin bu layihələrə cəlb olunması həm icma inkişafına, həm də turizm investisiyalarının artmasına şərait yaradıb.

Rəsmi qurumlar və bələdiyyələrin göstərdiyi dəstək sayəsində tarixi şəhərlərin irs simasını qorumaq və turistlər üçün cəlbedici hala gətirmək mümkün olub.