BAKI, AzerVoice

Özbəkistan Prezidenti Şavkat Mirziyoyev Macarıstanın Baş naziri Viktor Orbanın dəvəti ilə Budapeştə rəsmi səfərə gedib.

AzerVoice xəbər verir ki, Mirziyoyevi Budapeşt hava limanında Macarıstanın iqtisadi inkişaf naziri Marton Nad və digər rəsmi şəxslər qarşılayıblar.

Səfər çərçivəsində Özbəkistan lideri Macarıstanın rəsmi şəxsləri və aparıcı şirkətlərinin rəhbərləri ilə görüşlər keçirəcək.

Mirziyoyevin Macarıstan səfəri zamanı Türk Dövlətləri Təşkilatının 21 may tarixində Budapeştdə keçiriləcək qeyri-rəsmi sammitində iştirakı da nəzərdə tutulur.

Xatırladaq ki, Türk Dövlətləri Təşkilatına (TDT) üzv ölkələrin dövlət başçılarının qeyri-rəsmi sammiti 2025-ci il mayın 20–21-də Macarıstanın paytaxtı Budapeşt şəhərində keçiriləcək.

Sammit Macarıstanın Baş naziri Viktor Orbanın dəvəti ilə təşkil olunur. Toplantıda TDT-yə üzv ölkələrin prezidentləri, Azərbaycan, Qazaxıstan, Qırğızıstan, Türkiyə və Özbəkistan rəhbərlikləri iştirak edəcək.

Eyni zamanda, sammitdə təşkilata müşahidəçi statusu ilə qoşulan ölkələrin nümayəndələri və TDT-nin Baş katibi də iştirak edəcəklər.

Qeyd edək ki, bu, Türk Dövlətləri Təşkilatının tarixində ilk dəfədir ki, qeyri-rəsmi sammit müşahidəçi ölkənin ərazisində keçirilir