BAKI,AzerVoice, Fərid Mikayılov

Yunanıstan Hərbi Hava Qüvvələrində xidmət edən bir zabit NATO-ya məxsus məxfi məlumatları Çin tərəfinə ötürməkdə ittiham edilərək saxlanılıb.

AzerVoice xəbər verir ki, rəsmi qurumlar bildiriblər ki, hərbi əhəmiyyət daşıyan gizli məlumatların üçüncü tərəflərə ötürülməsinə dair konkret sübutlar mövcuddur.

Məlumata görə, casusluqda şübhəli bilinən şəxs Yunanıstan Hərbi Hava Qüvvələrində uzun illər xidmət etmiş telekommunikasiya və informasiya sistemləri üzrə mühəndisdir. Onun NATO çərçivəsində müxtəlif texniki vəzifələrdə çalışdığı bildirilir.

Zabitin Böyük Britaniyada yerləşən ali təhsil müəssisələrindən birində idarə olunan silah sistemləri üzrə magistr təhsili aldığı, radar texniki xidməti, təyyarə radar proqramlaşdırılması və informasiya sistemlərinin idarə olunması sahələrində fəaliyyət göstərdiyi qeyd olunur.

Yunan hərbi kəşfiyyatının məlumatına əsasən, şübhəli şəxslə xarici əlaqənin təxminən iki il əvvəl “LinkedIn” sosial şəbəkəsi üzərindən qurulduğu ehtimal edilir. Zabitin bu platformada NATO layihələri, rabitə sistemləri və peşəkar təcrübəsi barədə ətraflı məlumat paylaşdığı bildirilir.

Kəşfiyyat Xidməti tərəfindən həmin şəxsin aylarla müşahidə altında saxlanıldığı, ötürülən məlumatların həssaslıq səviyyəsinin artmasından sonra saxlanılma qərarının verildiyi açıqlanıb. İstintaq zamanı kritik sənədlərə girişdə istifadə edilən QR kodların əməliyyatın ifşasında mühüm rol oynadığı bildirilir.

Rəsmi qurumlar sızdırıldığı iddia edilən məlumatların konkret məzmunu və ötürüldüyü tərəflər barədə əlavə açıqlama verməyiblər. Bildirilib ki, fakt Yunanıstanın Hərbi Cinayət Məcəlləsinə uyğun olaraq araşdırılır və bütün hüquqi prosedurlar tətbiq ediləcək.