BAKI,AzerVoice, Fərid Mikayılov

Türkiyədə Fetullahçı Terror Təşkilatının (FETÖ) cari maliyyə fəaliyyəti və qondarma “TSK gizli xidmətləri” strukturu ilə bağlı aparılan istintaq çərçivəsində 8 şübhəli saxlanılıb.

AzerVoice xəbər verir ki, Ankara prokurorluğunun açıqlamasına əsasən, Terror Cinayətləri üzrə İstintaq Bürosunun göstərişi ilə Milli Kəşfiyyat Təşkilatı və Ankara Polis İdarəsinin Terrorla Mübarizə Şöbəsinin əməkdaşları FETÖ-nün aktual fəaliyyətlərinin ifşası məqsədilə birgə əməliyyat keçiriblər.

Texniki və fiziki müşahidə, eləcə də rəqəmsal materialların təhlili nəticəsində aralarında daha əvvəl dövlət qulluğundan xaric edilmiş iki nəfərin də olduğu 8 şübhəli müəyyən edilib. İstintaq materiallarına görə, bu şəxslər əvvəl təşkilat üzvlüyü ittihamı ilə mühakimə olunsalar da, iddianamə tarixlərindən sonra da fəaliyyətlərini davam etdiriblər və cari şəbəkə daxilində yer alıblar.

Şübhəlilərin yaşayış ünvanlarında və təşkilati fəaliyyət apardıqları məkanlarda aparılan axtarışlar zamanı ümumi dəyəri 2 milyon 500 min lirə olan borc sənədləri , 173 min 895 lirə nağd pul, 31 min 960 ABŞ dolları, 12 min 865 avro, 91 qram qızıl, həmçinin 1 tam və 11 çeyrek qızıl aşkar edilərək götürülüb.

Bundan əlavə, 23 mobil telefon, 11 noutbuk, 12 fləş yaddaş, 7 CD, 8 SIM kart, 3 sərt disk (HDD), 2 planşet və 3 yaddaş kartı da maddi sübut kimi müsadirə olunub.