BAKI, AzerVoice

İranın İslam İnqilabı Keşikçiləri Korpusunun Quru Qoşunlarının komandanı Məhəmməd Pakpur ABŞ və İsrailə hər hansı “səhv hesablamalara” yol verməmələri barədə sərt xəbərdarlıq edib.

AzerVoice xəbər verir ki, Məhəmməd Pakpur SEPAH-ın Silahlı Qüvvələrin Ali Baş Komandanının göstərişlərini yerinə yetirməyə tam hazır olduğunu bildirib. Onun sözlərinə görə, İran silahlı qüvvələrinin hazırlıq səviyyəsi əvvəlki dövrlərlə müqayisədə daha yüksəkdir. Komandan qeyd edib ki, “düşmən keçmişdən dərs çıxarmalıdır, əks halda daha ağrılı nəticələrlə üzləşə bilər”.

Bundan əvvəl İran parlamentində Ali Rəhbər Əli Xameneiyə qarşı hər hansı hücumun “müharibə elanı” kimi qiymətləndiriləcəyi və belə bir halda “cihad” fətvasının verilə biləcəyi barədə bəyanatlar səsləndirilib. Parlamentin Milli Təhlükəsizlik və Xarici Siyasət Komissiyasına istinadən yayılan məlumatda bildirilib ki, Ali Rəhbərin hədəfə alınması din xadimlərinin cihad çağırışı etməsinə və dünyanın müxtəlif bölgələrindəki tərəfdarların buna cavab verməsinə səbəb ola bilər.

Bu bəyanatlar beynəlxalq təzyiqlərin artdığı, eləcə də ölkə daxilində etiraz aksiyalarına qarşı təhlükəsizlik tədbirlərinin sərtləşdirildiyi bir dövrdə səsləndirilib. Xatırladaq ki, ABŞ Prezidenti Donald Tramp İranın Ali Rəhbəri Əli Xameneini ölkədə baş verən proseslərə görə məsuliyyət daşımaqda ittiham edərək, İranda yeni lider axtarmağın vaxtının çatdığını bildirmişdi.