BAKI, AzerVoice
“Facemark” şirkətinin təşkilatçılığı ilə 7 mart 2026-cı il tarixində Gülüstan Sarayında keçiriləcək II Qadın Liderləri Zirvəsi, fərqli sahələrdən olan güclü qadın liderləri bir araya gətirərək liderlik anlayışını dərin və çoxşaxəli müzakirə müstəvisinə daşıyacaq. Zirvə liderliyə gedən yolun reallıqlarını, qarşıya çıxan baryerləri və uzunmüddətli uğurun əsasını təşkil edən davamlılıq anlayışını ön plana çıxaracaq.
AzerVoice xəbər verir ki, tədbirin açılışında “BigChefs” brendinin təsisçisi Gamze Cizrelinin keynote çıxışı liderlik, sahibkarlıq və şəxsi inkişaf mövzularında beynəlxalq təcrübəyə əsaslanan baxışları ilə iştirakçılara ilham verəcək.
Zirvə bir gün ərzində baş tutacaq və üç əsas panel üzrə davam edəcək. Davos formatında keçiriləcək panellər çərçivəsində “Zirvəyə gedən yol”, “Zirvədəki baryerlər və maneələr” və “Zirvədə davamlılıq və dayanıqlılıq” mövzuları müzakirə olunacaq. Bu panellər qadınların liderlik yolculuğunun başlanğıc mərhələsindən zirvədə qalma strategiyalarına qədər olan bütün əsas mərhələləri əhatə edəcək.
“Zirvəyə gedən yol” paneli çərçivəsində “Əli və Nino” kitab şəbəkəsinin təsisçisi Nigar Köçərli, aparıcı Leyla Quliyeva, kamandan oxatma üzrə Azərbaycan milli yığmasının üzvü Yaylagül Ramazanova, “Pasha Real Estate”in Qrup Risk və Komplayens direktoru İlahə Qazıyeva və 92.5 Dalğa FM radiosunun direktoru, BDU-nun müəllimi Ayşən Aslan-Məmmədli çıxış edəcək. Panelə startap layihələrinin qurucusu Türkan Fərzəliyeva tərəfindən moderatorluq ediləcək. Bu paneldə spikerlər şəxsi və peşəkar inkişaf yolunda keçdikləri mərhələləri, qarşılaşdıqları çətinlikləri, verdikləri kritik qərarları və bu yol boyunca onları zirvəyə aparan əsas dönüş nöqtələrini müzakirə edəcəklər.
“Zirvədəki baryerlər və maneələr” panelində spikerlər qismində CNN Türkün Özəl Xəbərlər Müdiri Fulya Öztürk, “Liatris Holdinq”in direktoru Ruhiyyə Əliyeva, həyat kouçu, təlimçi və alpinist Vəfa Musayeva və “Metatesk” şirkətinin təsisçisi Günay İmanzadə şəxsi və peşəkar inkişaf real nümunələri bölüşəcəklər. Panelin moderatoru Baku TV-nin beynəlxalq əlaqələr şöbəsinin müdiri, diplomatik jurnalist Sevinc Gülməmmədova olacaq. Panel çərçivəsində qadınların peşəkar mühitdə öz şəxsi brendini formalaşdırması, düzgün kommunikasiya və görünürlük strategiyaları ilə seçilməsi, eləcə də rəqəmsal platformalarda etibarlı imic yaratması mövzuları ətrafında fikir mübadiləsi aparılacaq.
“Zirvədə davamlılıq və dayanıqlılıq” panel spikerləri sırasında “Moonwake Investment”in CFO-su Nazlı Məmmədova, “Leya Couture” brendinin təsisçisi Leyli Zalova, “MarLab” şirkətinin marketinq konsultantı və direktor müavini Şəbnəm Hümbətova, “BeeWelly” şirkətinin təsisçi və baş icraçı direktoru Talifa İsgəndərli və “WoWoman” platformasının CEO-su Arzu Ağazamanova olacaq. Panelin moderatoru “Baku Design Academy”nin təsisçisi Aysel Gülməmmədova olacaq. Bu paneldə spikerlər emosional zəkanın liderlikdə rolu və qadınların daxili gücünü qoruyaraq uğurlu yol çəkməsi barədə təcrübələrini bölüşəcəklər.
Qadın Liderləri Zirvəsi biznes, media, maliyyə, startap, mədəniyyət və yaradıcı sənayeləri təmsil edən qadın liderlərin real təcrübələrini bir araya gətirərək, iştirakçılara ilhamverici dialoq, praktik bilik və güclü şəbəkələşmə imkanı təqdim edəcək.
Tədbirdə iştirak və ətraflı məlumat üçün qlz.az saytına daxil ola bilərsiniz.
Məlumat üçün bildirək ki, Türkdilli dövlətlərin ilk ortaq media platforması olan “Türk Dünyası” (TurkicWorld) və AzerVoice II Qadın Liderləri Zirvəsinin rəsmi media tərəfdaşıdır.