BAKI,AzerVoice

Azərbaycan ilə Suriya arasında ticarət-iqtisadi əlaqələrin genişləndirilməsi məqsədilə Azərbaycan–Suriya İşgüzar Şurasının yaradılması nəzərdə tutulur.

AzerVoice xəbər verir ki, təşəbbüs iki ölkə arasında işgüzar əməkdaşlığın institusional əsasda inkişaf etdirilməsinə, qarşılıqlı investisiya imkanlarının genişləndirilməsinə və biznes dairələri arasında birbaşa əlaqələrin qurulmasına xidmət edəcək.

Bu çərçivədə Suriya bazarı ilə əməkdaşlıqda maraqlı olan, ticarət, investisiya, İT, tikinti, istehsal, sənaye, xidmət və digər sahələrdə fəaliyyət göstərən yerli şirkətlər İxracın və İnvestisiyaların Təşviqi Agentliyinə - AZPROMO-ya müraciət edə bilərlər.

Məlumata görə, İşgüzar Şura platforması vasitəsilə Azərbaycan və Suriya arasında biznes missiyalarının təşkili, birgə layihələrin təşviqi, investisiya mühitinə dair məlumat mübadiləsi və tərəfdaşlıqların qurulması planlaşdırılır.

Qeyd edək ki, bu addım postmünaqişə dövründə regionda iqtisadi əməkdaşlıq formatlarının şaxələndirilməsi və yeni bazarlara çıxış imkanlarının genişləndirilməsi baxımından əhəmiyyətli hesab olunur.