BAKI, AzerVoice, Fərid Mikayılov

ABŞ Federal Məhkəməsi Donald Tramp administrasiyasının qərarını ləğv edərək Tufts Universitetinin doktorant tələbəsi Rumeysa Öztürkün tələbə statusunun bərpa olunması barədə göstəriş verib. Qərar tələbənin miqrasiya saxlanma mərkəzində səkkiz ay ərzində qanunsuz şəkildə saxlanılması ilə bağlı proseslər fonunda elan olunub.

AzerVoice xəbər verir ki, məhkəmənin hakimi Denise Kaspers imzaladığı qərarla Öztürkün ABŞ Gömrük və Miqrasiya Xidməti (ICE) tərəfindən idarə olunan SEVIS tələbə bazasından silinməsinin qanunsuz olduğunu bildirib və onun qeydiyyatının dərhal bərpasını tələb edib.

Bu addım tələbəyə təhsil proqramı üzrə tədqiqat aparmaq və işləmək hüququnu yenidən təmin edir.

Öztürk açıqlamasında tələbə vizasının “qanunsuz şəkildə ləğv edildiyini” bildirib:

“Səkkiz ay sonra nəhayət ki, tələbə qeydiyyatım bərpa olunacaq. Həbsim və Louisianada 45 gün davam edən qeyri-qanuni saxlanılmam mənə təhsil hüquqları əllərindən alınan insanlar – xüsusilə də Qəzzadakı tələbələr barədə daha dərindən düşünməyə vadar etdi”- deyə o bildirib.

Öztürk Tramp administrasiyasının İsrailin Qəzzadakı hərbi əməliyyatlarına etiraz edən tələbələrə qarşı həyata keçirdiyi genişmiqyaslı tədbirlər çərçivəsində 25 mart 2024-cü ildə saxlanılmışdı. O, “HƏMAS-a dəstək vermək” adı altında vizasının ləğv edilməsi ilə üzləşmiş, amma vəkilləri bu iddianı əsassız adlandırmışdı.

Tələbə Tufts Daily qəzetində dərc olunan və “Fələstin soyqırımının tanınması” və universitetin İsraillə əlaqəli şirkətlərdən vəsaitlərini geri çəkməsi çağırışı edən məqalənin həmmüəlliflərindən biri olub.