BAKI, AzerVoice, Nailə Babazadə

Fransada iki jurnalist təşkilatı, jurnalistlərin fəaliyyətinə mane olduğu iddiası ilə İsrailə qarşı şikayət ərizəsi təqdim edib.

AzerVoice xəbər verir ki, Le Monde nəşrinin xəbərinə görə, Jurnalistlər Milli Sindikatı (SNJ) və Beynəlxalq Jurnalistlər Federasiyası (FIJ) İsrailin Qəzzada “xəbər azadlığını əngəllədiyi” səbəbilə Parisdə hüquqi prosesə müraciət edib.

Təşkilatlar, Qəzzaya jurnalistlərin girişinə icazə verməyən İsrailin “müharibə cinayəti törətdiyini” bildirərək, bu cinayətlərin araşdırılmasına cavabdeh olan Fransa Milli Antiterror Prokurorluğuna şikayət təqdim edib.

France Info kanalının məlumatına görə, iki təşkilat yüz səhifəlik şikayət sənədi təqdim edib. Bu, Fransada İsrailə qarşı “mətbuat azadlığını pozduğu” iddiası ilə verilmiş ilk şikayət kimi qeyd olunur.

Təşkilatlar, İsrailin jurnalistlərin fəaliyyətini koordinasiyalı şəkildə zorakı üsullarla əngəlləməsini qınadıqlarını vurğulayıb.

Qeyd edək ki, İsrailin 2023-cü ilin oktyabrında Qəzza zolağına başladığı hücumlarda 70 min 112 nəfər həyatını itirib, 170 min 986 nəfər isə yaralanıb. Hələ də dağıntılar altında minlərlə cəsədin qaldığı bildirilir.

Qəzzada 250-dən artıq jurnalist İsrail tərəfindən hədəf alınaraq öldürülüb.

Fələstin Jurnalistlər Sindikatının 5 noyabr tarixli aylıq hesabatında qeyd olunub ki, İsrail ordusu yalnız oktyabr ayında Qəzzada 2 jurnalisti öldürüb, 10 jurnalisti yaralayıb, 9 jurnalistin isə evini dağıdıb.