BAKI,AzerVoice, Nailə Babazadə

ABŞ Prezidenti Donald Tramp, Nyu-York bələdiyyə başçısı seçkilərini qazanan Demokrat namizəd Zahran Mamdani ilə sabah görüş keçirəcəyini açıqlayıb.

AzerVoice xəbər verir ki, Tramp sosial media hesabında paylaşdığı bəyanatda Mamdaninin görüş istədiyini bildirib.

“Nyu-Yorkun kommunist bələdiyyə başçısı Zahran Mamdani görüş tələb etdi. 21 noyabr Cümə günü Oval Ofisdə görüşməyə razılaşdıq. Ətraflı məlumat tezliklə.” - deyə Tramp paylaşımda qeyd edib.

Prezident daha öncə Fox News-ə müsahibəsində Mamdani haqqında danışaraq, onun Vaşinqtona hörmətlə yanaşmalı olduğunu qeyd etmişdi.

“Düşünürəm ki, mənə yaxşı davranmalıdır. Ona göndərilən bir çox məsələni təsdiqləyən mənəm.” - deyə Tramp qeyd etmişdi.

Seçkilərin ilkin nəticələri elan edildikdən sonra Tramp prosesi “saxtakarlıq” adlandırmış və Demokratların Nyu-Yorkda “kommunist” bir namizədi seçdiyini iddia etmişdi.

Qeyd edək ki, Uqanda əsilli 34 yaşlı Zahran Mamdani, 4 noyabr seçkilərinin qeyri-rəsmi nəticələrinə əsasən, ABŞ-ın ən böyük şəhərinə rəhbərlik edəcək son yüz ildəki ən gənc və ilk müsəlman siyasətçi olub. CBS News-in məlumatına görə, seçkilərdə 2 milyondan çox seçici iştirak edib ki, bu da 1969-cu ildən bəri ən yüksək göstəricidir. Mamdani ümumilikdə 1 milyon 39 min səs toplayıb.

O, vəzifəni 1 yanvar 2026-da müddəti başa çatan Erik Adamsdan təhvil alacaq. Nyu-Yorkun əhalisi 9 milyona yaxındır.