BAKI, AzerVoice, Nailə Babazadə

ABŞ-ın prezidenti Donald Tramp gömrük rüsumlarının ləğvinin ölkəsi üçün dağıdıcı nəticələrə səbəb olacağını, bu rüsumlar olmasa bütün dünyanın iqtisadi böhrana düşəcəyini iddia edib.

AzerVoice xəbər verir ki, Tramp bu fikirləri Fox News telekanalına verdiyi müsahibədə səsləndirib və ABŞ Ali Məhkəməsində baxılan tarifə işi barədə danışıb.

O bildirib ki, Ali Məhkəmədə aparılan prosesin “yaxşı keçdiyini” eşidib və bu işi “ABŞ tarixindəki ən mühüm məhkəmə işlərindən biri” kimi qiymətləndirib.

“Əgər bu işi uduzsaq, ölkəmiz üçün dağıdıcı nəticələr ola bilər,” – deyə Tramp qeyd edib.

Tarifələri müdafiə edən prezident misal olaraq Çin lideri Si Cinpini göstərib.

“Məsələn, Prezident Si bizi nadir torpaq elementləri ilə hədəfə aldı. Mən də ona qarşı 100 faiz tarif tətbiq etdim. 10 dəqiqə sonra zəng etdilər və razılaşma əldə etdik.” -deyə Tramp qeyd edib.

Tramp əlavə edib ki, gömrük tarifləri olmasa, bütün dünya böhrana girərdi.

“Bu, təkcə bizə qarşı yox, bütün dünyaya qarşı bir təhlükə idi. Mən bunu dünya üçün etdim.” - deyə o qeyd edib.

O, həmçinin Çin lideri Si Cinpin və digər ölkə rəhbərləri ilə çox uğurlu görüşlər keçirdiyini, bu görüşlərin məhz gömrük rüsumlarının tətbiqi sayəsində mümkün olduğunu vurğulayıb.