BAKI, AzerVoice, Nailə Babazadə
İtaliyanın Baş naziri Giorgia Meloni bildirib ki, HƏMAS Fələstinin gələcəyində siyasi rol oynamaqdan imtina etmədən və silahı yerə qoymadan, İtaliyanın Fələstin Dövlətini tanıması mümkün deyil.
AzerVoice xəbər verir ki, Meloni bu fikirləri 23–24 oktyabrda Brüsseldə keçiriləcək Avropa İttifaqı (Aİ) Liderlər Zirvəsi öncəsi parlamentin yuxarı palatası olan Senatda çıxışı zamanı səsləndirib. O, həm beynəlxalq gündəmin aktual məsələləri, həm də hökumətinin bu məsələlərə münasibəti barədə məlumat verib.
Baş nazir qeyd edib ki, Zirvə "son dərəcə mürəkkəb beynəlxalq vəziyyətdə" keçiriləcək və üç ildir hakimiyyətdə olan hökuməti həm İtaliya, həm də Avropa İttifaqı üçün "nadir sabitlik nümunəsi" sayılır.
Meloni, ABŞ Prezidenti Donald Trampın təqdim etdiyi və Şarm əl-Şeyxdə imzalanmış 20 maddəlik sülh planını bölgə üçün "müsbət inkişaf" adlandırıb və bu diplomatik təşəbbüsə görə başda ABŞ, Misir, Qətər və Türkiyə olmaqla bütün vasitəçilərə təşəkkürünü bildirib. Trampın bu prosesdə "inkarolunmaz uğura nail olmaq üçün böyük enerji sərf etdiyini" vurğulayıb.
O, uzun fasilədən sonra Yaxın Şərqdə ədalətli və daimi sülh üçün real bir imkanın yarandığını, lakin vəziyyətin hələ də "həssas və kövrək" olduğunu bildirib. Meloni, HƏMAS-ın atəşkəsi pozduğunu iddia etsə də, İsrailin mülki itkilərə səbəb olan cavab hücumlarını dəstəkləmədiklərini də xüsusi qeyd edib.
Meloni əlavə edib ki, plandakı məqsədlərə çatmaq üçün HƏMAS keçid hökumətində və gələcək Fələstin Dövlətində heç bir rol oynamamalı, həmçinin silahsızlandırılmalıdır. Onun sözlərinə görə, bu, İtaliyanın Fələstin Dövlətini tanıması üçün əsas ilkin şərtdir və bu yanaşma parlament tərəfindən də təsdiqlənib.
“Hökumət bu şərtlər yerinə yetirildiyi halda hərəkətə keçməyə hazırdır. İtaliya bütün tərəfləri sülh planının şərtlərinə hörmət etməyə və yaranmış fürsətdən istifadə etməyə çağırır. Əlbəttə ki, İtaliya üzərinə düşəni etməyə hazırdır”, – deyə Meloni bildirib.
Meloni həmçinin İsrailin qeyri-qanuni yaşayış məntəqələrinə qarşı olduqlarını bəyan edib.
“İsrailin yeni yaşayış yerləri salmaq planlarını qınayırıq və bəzi İsrailli rəsmilərin zorakı bəyanatlarını qəbuledilməz hesab edirik. Buna görə onlara qarşı Avropa səviyyəsində fərdi sanksiyaları dəstəkləməyə hazırıq”, – deyə o bildirib.
İtaliya hökumətinin 2024-cü ilin mart ayında başladığı “Qəzza üçün ərzaq” kampaniyası çərçivəsində artıq 200 tondan çox yardım göndərildiyini və 196 Qəzzalını müalicə üçün İtaliyaya gətirdiklərini açıqlayan Meloni əlavə edib ki, “Carabinieri” adlı İtaliya jandarma qüvvələri Erihada Fələstin polisinə və Rəfahda AB missiyasına təlim keçməyə davam edir, bu missiyaların sayını artırmağa da hazırdır.
“Bunu noyabr ayının əvvəlində Romada görüşəcəyim Fələstin Prezidenti Mahmud Abbasla da bölüşəcəyəm”, – deyə o vurğulayıb.