BAKI, AzerVoice, Nailə Babazadə

Pakistanın Pəncab əyalətinin şərqində güclü yağışlar nəticəsində baş verən daşqınlar son 24 saat ərzində 122 mindən çox insanın təxliyəsinə səbəb olub.

AzerVoice xəbər verir ki, Pəncab Təbii Fəlakətlərin İdarə Olunması İdarəsinin (PDMA) baş direktoru İrfan Əli Katia, əyalətin Cəlalpur Pirvala şəhərində aparılan təxliyə işləri ilə bağlı açıqlama verib.

O bildirib ki, Cəlalpur Pirvala şəhərində son 24 saat ərzində 122 mindən artıq insan evlərini tərk etmək məcburiyyətində qalıb. Çoxları ya qohumlarının yanına sığınıb, ya da yardım düşərgələrində yerləşdirilib.

Katia əlavə edib ki, ötən aydan bəri davam edən daşqınlar nəticəsində ümumilikdə Pəncabda 2,2 milyon insan yerindən didərgin düşüb, 3900-dən çox kənd isə su altında qalıb.

Digər tərəfdən, keçən aydan bu yana baş verən daşqınlarda ən azı 61 nəfər həyatını itirib.

Pakistanın Milli Fəlakətlərin İdarəolunması Təşkilatının məlumatına görə, 26 iyun tarixində başlayan musson yağışları nəticəsində ölənlərin ümumi sayı 910 nəfərə çatıb.

Rəsmilər bildirirlər ki, bu daşqınlar 2022-ci ildə ölkənin üçdə birini su altında qoyan, 1700-dən çox insanın ölümünə və 32 milyard dollarlıq ziyana səbəb olan fəlakətdən sonra baş verən ən böyük təbii hadisədir.