BAKI, AzerVoice, Nailə Babazadə
İran və Pakistanın yüksək səviyyəli rəsmiləri İslamabadda keçirilən görüşdə Fələstin xalqına dəstək məqsədilə birgə və koordinasiyalı fəaliyyətin vacibliyini qeyd ediblər.
AzerVoice xəbər verir ki, İranın Ali Milli Təhlükəsizlik Şurasının (SNSC) katibi Əli Laricani və Pakistan Xarici İşlər naziri Məhəmməd İshaq Dar arasında keçirilən görüşdə son regional inkişaflar və İslam ölkələrinin ortaq çağırışlarla mübarizədə birgə addımlar atmasının zəruriliyi müzakirə olunub.
Rəsmi şəxslər regiondakı böhranların həlli, xüsusilə də sionist rejimin müsəlman ölkələrinə qarşı yaratdığı təhlükəyə qarşı mübarizədə İslam dünyasının praktik tədbirlər, geniş koordinasiya və vahid əməkdaşlıq tələb etdiyini bildiriblər.
Görüşdə Fələstin məsələsi İslam dünyasında əməkdaşlığın əsas sütunlarından biri kimi vurğulanıb və Tehran ilə İslamabad arasında Fələstin xalqına dəstək sahəsində həmrəyliyin, yaxınlaşmanın və koordinasiyanın vacibliyi qeyd edilib.
Əli Laricani İran və Pakistan arasında uzunmüddətli əlaqələri vurğulayaraq, ikitərəfli münasibətlərin strateji səviyyəyə yüksəldilməsinin zəruriliyini bildirib. O, iki qonşu ölkənin iqtisadi imkanlarının mövcud səviyyədən xeyli yuxarı işləyə biləcəyini qeyd edib və illik ikitərəfli ticarətin 10 milyard dollara çatdırılması məqsədilə mövcud maneələrin aradan qaldırılması və iqtisadi əlaqələrin asanlaşdırılması çağırışı edib.
Hər iki rəsmisi qarşılıqlı məsləhətləşmələrin davam etdirilməsinə və birgə razılaşmaların praktik tətbiqinə hazır olduqlarını ifadə ediblər.