BAKI, AzerVoice
Araşdırmalar göstərir ki, nahar kimi əsas yeməkləri ötürmək yaddaş pozuntularına və həddindən artıq yeməyə səbəb ola bilər.
AzerVoice xəbər verir ki, Cənubi Kaliforniya Universitetinin tədqiqatçıları beynin qida ilə bağlı yaddaş izlərini formalaşdırmaqda rolunu araşdıraraq müəyyən ediblər ki, yemək vərdişlərinin pozulması, xüsusilə də naharın ötürülməsi, həddindən artıq aclıq hissinə və nəzarətsiz qida qəbuluna gətirib çıxara bilər.
Tədqiqatın müəllifləri izah edirlər ki, yemək təcrübəsinin beyində doğru şəkildə yadda qalmaması – yəni zəif və ya natamam “qida enqramlarının” yaranması – aclıq hissini artıra və insanı çox yeməyə meylləndirə bilər. Bu enqramlar hipokampusda – yaddaş və öyrənmə ilə bağlı beyin bölgəsində – formalaşır və beynin aclıq hissini tənzimləyən lateral hipotalamusla əlaqəlidir. Bu neyron əlaqələri kəsildikdə isə, həddindən artıq yemək davranışları müşahidə olunur.
Araşdırmalar laboratoriya siçanları üzərində aparılıb və bu siçanların yeməklə bağlı yaddaş hüceyrələri zədələndikdə, yeməyin yerini xatırlaya bilmədikləri, lakin digər məkan yaddaşlarının pozulmadığı müşahidə olunub. Alimlər həmçinin qeyd edirlər ki, diqqətin yayınması və impulsiv qəlyanaltı yemək də bu yaddaş izlərini poza bilər.
Qeyd edək ki, araşdırma “Nature Communications” jurnalında dərc olunub və nəticələr piylənmə və çəki idarəçiliyinə qarşı yeni klinik yanaşmaların formalaşmasına töhfə verə bilər. Tədqiqatçılar hesab edirlər ki, qidalanmada yalnız “nə yeyirik” deyil, “nə vaxt və necə xatırlayırıq” sualları da bir o qədər əhəmiyyətlidir.
