BAKI, AzerVoice
Almaniya hökuməti Qəzzada humanitar yardımın paylanma mexanizmini qeyri-adekvat hesab edir.
AzerVoice xəbər verir ki, Almaniya
hökuməti ABŞ və İsrailin dəstəklədiyi Qəzza Humanitar Fondunun
(GHF) yardım bölgüsünü və fəaliyyət üsullarını tənqid edib.
Yaşıllar Partiyasının məsələ ilə bağlı verdiyi parlament sualına
cavabda rəsmi Berlin GHF-nin yeni paylama mexanizminin mülki
əhaliyə kifayət qədər çatmadığını və humanitar prinsiplərə uyğun
gəlmədiyini vurğulayıb.
Alman hökumətinin cavabında Qəzza zolağındakı humanitar vəziyyət “dözülməz” kimi qiymətləndirilib. Bildirilib ki, əhalinin iztirabları yüngülləşdirilməli və vəziyyət beynəlxalq humanitar hüquq və prinsiplər çərçivəsində yaxşılaşdırılmalıdır.
Hökumət, həmçinin yardım almağa çalışan insanların həyatını itirməsinə diqqət çəkərək, bu hadisələrin hərtərəfli və şəffaf şəkildə araşdırılmasını tələb edib. İsrailin beynəlxalq humanitar hüquqa riayət etməli və Qəzzada mülki əhalini mümkün qədər qorumağa borclu olduğu bir daha xatırladılıb.
Almaniya hökuməti həmçinin BMT və digər humanitar təşkilatların bölgədəki fəaliyyətlərini müstəqil və qərəzsiz şəkildə davam etdirə bilmələri üçün şərait yaradılmasına çağırıb.
Qeyd edək ki, mayın 27-dən bəri İsrailin rəhbərlik etdiyi GHF-nin yardım bölgüsündə baş verən hücumlar nəticəsində 922 fələstinli həlak olub, 5861 nəfər yaralanıb.
