BAKI, AzerVoice

Çində aşkar edilən yeni koronavirus insanlara keçmək üzrədir.

AzerVoicexəbər verir ki, Çində aşkarlanan yeni koronavirus ştammı – HKU5-CoV-2, kiçik bir genetik dəyişikliklə insanlara yoluxa və genişmiqyaslı epidemiyaya səbəb ola bilər.

Vaşinqton Dövlət Universitetinin Nature Communications jurnalında dərc olunan araşdırmasına əsasən, bu virus COVID-19 və MERS kimi zoonoz viruslara bənzəyir və insan hüceyrələri ilə qarşılıqlı əlaqəyə girmək üçün yalnız cüzi bir mutasiyaya ehtiyac duyur.

HKU5-CoV-2 virusu həm tənəffüs yollarında, həm də bağırsaq hüceyrələrində çoxalmaq qabiliyyətinə malikdir. Tədqiqatçılar bu virusun, 2012-ci ildə 35% ölüm faizi ilə tanınan MERS virusu ilə yaxın əlaqədə olduğunu bildiriblər. Professor Michael Letko qeyd edib ki, “Bu viruslar insanlara keçmək üçün bir addımlıq məsafədə ola bilər.”

Qeyd edək ki, HKU5 virusu 2019-cu ildə yarasalarda aşkar edilib və zoonoz potensialı yüksək olan viruslardan hesab olunur. Hazırda bu virusun insanlara yoluxduğuna dair heç bir təsdiqlənmiş hal qeydə alınmasa da, tədqiqatçılar onun mutasiyasını diqqətlə izləməyi tövsiyə edirlər.