BAKI, AzerVoice
Roma Papası XIV Leo, papa hakimiyyətinin rəmzləri olan “Balıqçının üzüyü” və xaçlarla bəzədilmiş yun lent – pallium ilə təltif olunub. Bu qədim mərasim 267-ci Roma Papasının pontifikatının rəsmi başlanğıcını qeyd edib.
AzerVoice xəbər verir ki, bu barədə Vatikanın mətbuat xidməti məlumat yayıb.
Məlumata görə, inauqurasiya mərasimini Papa XIV Leo özü idarə edib. Ayin zamanı o, “Cənnət Kraliçasına dua” və “Urbi et Orbi” (şəhərə və dünyaya ünvanlanan xeyir-dua) ilə çıxış edib.
Müqəddəs Pyotr meydanında 150 minə yaxın zəvvar toplaşıb. Mərasimdə 150-dən çox xarici dövlət nümayəndə heyətləri, kral ailələri və müxtəlif dini icmalar iştirak edib.
Bu il sentyabrın 14-də 70 yaşı tamam olacaq Roma Katolik Kilsəsinin yeni rəhbərinə uzun pontifikat (papalıq dövrü) proqnozlaşdırılır. O, pontifikatının mərkəzində sosial ədalət mövzularının və rəqəmsal inqilab fonunda beynəlxalq münaqişələrin tənzimlənməsi səylərinin duracağını bildirib.
Ayində etdiyi moizədə XIV Leo, kilsənin birliyinə çağıraraq bunun sülh şəraitində birgəyaşayış üçün təməl olduğunu vurğulayıb.
“Zamanımızda hələ də çoxlu nifaq, nifrət, zorakılıq, ayrı-seçkilik və başqalarına qarşı qorxunun doğurduğu yaralar var. İqtisadi sistemlər yerin resurslarını istismar edir, yoxsulları isə kənara atır” - deyə, pontifik qeyd edib.
"Missioner ruh bizi dünyadan üstün tutmaq üçün deyil, Tanrının məhəbbətini hər kəsə çatdırmaq üçün ruhlandırmalıdır. Bu məhəbbət fərqləri silmir, əksinə, hər bir xalqın mədəni köklərini və tarixi təcrübəsini zənginləşdirərək birləşdirir” - deyə, o əlavə edib.
XIV Leo, özünün “xüsusi bir üstünlüyə malik olmadan” seçildiyini və “iman və sevinclə başqalarına xidmət edən bir qardaş kimi” bu böyük vəzifəni təvazökarlıqla qəbul etdiyini bildirib.
Papa XIV Leo, Latın dilində ayinlərə və ənənəvi kilsə nəğmələrinə meylli olduğunu göstərərək, bəzi duaları şəxsən oxuyub və ilahiləri özü səsləndirib.
Qeyd edək ki, ABŞ vətəndaşı və Peru missiyası təcrübəsi olan amerikalı kardinal Robert Frensis Prevo tarixdə ilk dəfə ABŞ-dan seçilmiş Roma Papası olub.