BAKI, AzerVoice
ABŞ-ın "Microsoft" şirkəti ilk dəfə olaraq, Qəzza zolağındakı son hərbi əməliyyatlar zamanı İsrail ordusuna bulud hesablama və süni intellekt texnologiyaları təqdim etdiyini rəsmən etiraf edib.
AzerVoice xəbər verir ki, bu barədə “İndependent” qəzeti məlumat verib.
Məlumata görə, şirkət bu texnologiyaların israilli girovların yerinin müəyyənləşdirilməsi və xilas edilməsinə kömək etdiyini, lakin fələstinlilərin hədəf alınmasında istifadə edildiyinə dair dəlil olmadığını bildirib.
Etiraf, şirkətin rəsmi saytında imzasız şəkildə yerləşdirilən bəyanatda yer alıb.
Mənbələrə görə, İsrailin süni intellekt texnologiyasından hərbi məqsədlərlə istifadəsi əvvəlki dövrlə müqayisədə 200 dəfə artıb. İsrail ordusu, “Microsoft”un “Azure” platformasından istifadə edərək müşahidə vasitələri ilə toplanan məlumatları mətnə çevirir, təhlil edir və süni intellektlə işləyən hədəf sistemlərinə daxil edir.
“Microsoft” bu dəstəyi yalnız 250-dən çox israilli girovun xilasına yönəldilmiş fövqəladə və məhdud yardım kimi təqdim edib. Şirkət, İsrail tərəfindən təqdim edilən bəzi tələbləri rədd etdiyini və göstərilən dəstəyin ciddi nəzarət altında həyata keçirildiyini bildirib. Dəstəyə “Azure” xidmətləri, dil proqramları, bulud saxlama və kibertəhlükəsizlik sahəsində əməkdaşlıq daxildir.
Xatırladaq ki, 2023-cü ilin 7 oktyabr tarxindən bəri Qəzzada 50 minə yaxın insan, əsasən qadın və uşaqlar həyatını itirib, İsrail tərəfdə isə HƏMAS hücumlarında təxminən 1200 nəfər ölüb.
