BAKI, AzerVoice
Almaniya kansleri Fridrix Mers bildirib ki, ABŞ prezidenti Donald Tramp Rusiya prezidenti Vladimir Putinlə telefon danışığı aparmazdan əvvəl, o, Fransa prezidenti Emmanuel Makron və Böyük Britaniyanın baş naziri Kir Starmerlə birlikdə Trampla məsləhətləşmələr aparacaq.
AzerVoice xəbər verir ki, bu barədə Mers Romada, Roma Papası XIV Leonun inauqurasiya mərasimi çərçivəsində jurnalistlərə açıqlama verib.
“Biz ABŞ prezidenti ilə bu telefon danışığına hazırlıq çərçivəsində yenidən müzakirə aparmaq barədə razılığa gəldik. Ümid edirik ki, bu, irəliləyişə gətirib çıxarar” - deyə, kansler bildirib.
Mers, ABŞ dövlət katibi Marko Rubio ilə də söhbət etdiyini və mayın 19-da Tramp-Putin danışığının gündəmdə olduğunu təsdiqləyib. Onun sözlərinə görə, Avropa və Amerika tərəfləri bu dəhşətli müharibənin tezliklə sona çatması üçün birgə və məqsədyönlü şəkildə işləməyə qərarlıdırlar.
“Son günlərdə bir sıra kiçik irəliləyişlər əldə edilib. Bəli, bunlar kiçik addımlardır, lakin tərəflərin bir-biri ilə danışıqlar aparması özü müsbət haldır” - deyə, Mers qeyd edib. O, bu kontekstdə Rusiya və Ukrayna arasında əldə olunmuş əsir mübadiləsi razılaşmasını xatırladıb.
Xatırladaq ki, ABŞ prezidenti Donald Tramp daha əvvəl Truth Social sosial şəbəkəsində paylaşım edərək, mayın 19-da saat 10:00-da Vladimir Putinlə telefon danışığı aparacağını bəyan etmişdi. Gündəmə Ukrayna münaqişəsinin həlli və ticarət məsələlərinin daxil olduğu qeyd olunmuşdu. Tramp bu söhbətdən sonra Ukrayna prezidenti Volodimir Zelenski və NATO ölkələrinin liderləri ilə də danışacağını qeyd etmişdi.
Həmçinin xatırladaq ki, Putin və Tramp arasında son telefon danışığı martın 18-də baş tutmuşdu.